جاڭالىقتار
قاراعاندىدا اكەسى 15 جاستاعى قىزىن دوسىنا ماجبۇرلەپ تۇرمىسقا بەرگەن
فوتو: اشىق دەرەككوز
قاراعاندى وبلىسى اباي قالاسىندا 15 جاسار قىزدى وگەي اكەسى 38 جاستاعى ەر ادامعا ءماجبۇرلى تۇردە تۇرمىسقا بەرمەك بولعان, دەپ حابارلايدى Skifnews.kz اقپارات پورتالى Orda.kz-كە سىلتەمە جاساپ.
نەمولچي.kz قورىنىڭ مالىمەتىنشە, تۇرمىسقا شىققاننان كەيىن بەس كۇن بويى زورلىق كورگەن قىز جۇرەك اۋرۋىمەن اۋىراتىن تۋعان اكەسىنە قاشىپ بارعان.
«ولار بىردەن پوليتسياعا ارىز جازعان, الايدا ادەتتەگىدەي, ارىز قابىلدانباعان, ساراپتاماعا دا جىبەرمەگەن. ءبىزدىڭ ويىمىزشا, ادەيى ۋاقىت سوزىپ وتىر. ءبىز ارالاسقاننان كەيىن جانە يۋۆەنالدى پوليتسيانىڭ كومەگىمەن قىزدى قاراعاندىعا ساراپتاماعا جىبەردى. الايدا تەرگەۋشى قۇجاتتاردى دۇرىس راسىمدەمەگەندىكتەن, قىزدى ساراپتاماسىز كەرى قايتاردى. بۇل تاعى دا ۋاقىت جوعالتۋدى بىلدىرەدى», دەپ مالىمدەدى Nemolchi.kz وكىلدەرى.
سونىمەن قاتار, ۇيىمنىڭ ايتۋىنشا, وسى ۋاقىتتا قىزدى بەس كۇن بويى زورلادى دەگەن ەر ادامنىڭ سىبايلاستارى قىزدىڭ تۋعان اكەسىنىڭ ءۇيىنىڭ ماڭىندا تورۋىلداپ, ونى قورقىتىپ-ۇركىتىپ جاتىر.
قاراعاندى وبلىسىنىڭ پوليتسيا دەپارتامەنتى 15 جاستاعى قىزعا قاتىستى قىلمىستىق ءىستى تەرگەپ جاتقانىن مالىمدەدى.
«اتالعان قىلمىسقا قاتىسى بار بارلىق ادامدار انىقتالىپ, جاۋاپ الىندى. تەرگەۋ اياسىندا وقيعانىڭ بارلىق ءمان-جايىن انىقتاۋ ءۇشىن قاجەتتى سوت ساراپتامالارى تاعايىندالدى. قىلمىستىق-پروتسەستىك كودەكستىڭ 201-بابىنا سايكەس جانە تەرگەۋ مۇددەسىن ەسكەرە وتىرىپ, وزگە اقپارات جاريالانبايدى», – دەپ حابارلادى پوليتسيا دەپارتامەنتىنىڭ ءباسپاسوز قىزمەتى.
