Qaraǵandyda UQK-niń burynǵy qyzmetkeri naýqas qyzdyń emine jınalǵan aqshany «jymqyrdy»

Foto: ashyq derekkóz

Qaraǵandyda UQK-niń burynǵy qyzmetkeri naýqas balanyń emine jınalǵan aqshany jymqyrdy degen kúdikke ilindi, dep jazady qandastar.kz Informbıýro baǵdarlamasyna silteme jasap.

Qaraǵandylyq zańger Ashat Sulýbektiń aıtýynsha, ulttyq qaýipsizdik komıteti Qaraǵandy ​​oblysy boıynsha departamentiniń burynǵy qyzmetkeri Almas Mahanov jubaıymen birge 6 aıdyń ishinde 9 jyljymaıtyn múlik, onyń ishinde Astananyń ortalyǵynda 6 páter jáne 19 lıýks kólik satyp alǵan. Al buǵan deıin erli-zaıyptylar qyzdaryn Koreıada emdetý úshin 135 mıllıon teńge jınaǵan. Sábıge qan qaterli isigi dıagnozy qoıylǵan eken.

«Bul jerde olar bul múlikti qandaı qarajatqa jáne ne úshin satyp aldy degen suraq týyndaıdy. Meniń oıymsha, tekserilýi kerek”, –  deıdi zańger Ashat Sulýbek.

Alaıda, erli-zaıyptylar shynynda da qyzyn Ońtústik Koreıaǵa aparyp, aýrýdan emdelip kelgen. Barlyq aqparat áleýmettik jelilerde jarııalanǵan. Almas Mahanovtyń ózi túsinikteme berip, qyzy aýyryp qalǵanda baryn satyp, nesıe alǵanyn, alaıda ol aqshanyń jetpegenin aıtty. Sondyqtan elden kómek suraǵan. Qaryzyn óteý úshin Almas Mahanov alyp-satý arqyly aqsha tabýdy josparlaǵan.

“Jyljymaıtyn múlik satyp alamyn, qaıta satamyn, kólik satyp alamyn, qaıta satamyn. Men dostarymnan aqsha aldym, sol aqshany paıdalandym, aqsha taptym, dostaryma paıyzymen tóledim. Alaıaq izdep jatsańyzdar, alaıaqtyq joq”, – deıdi UQK-niń burynǵy qyzmetkeri Almas Mahanov.

Almas Mahanovtyń aıtýynsha, ol páterler men kólikterdi satyp, aqshasyn qaryz berýshilerge qaıtarmaq.

«Úmit sáýlesi» balalar men múgedekterge kómek kórsetý ortalyǵynyń jetekshisi Tatıana Kravchenko elde qaıyrymdylyq arqyly aqsha tabýdyń shemalary jıi kezdesetinin aıtady. Onyń aıtýynsha, ata-analar balalarynyń emdelýine aqsha jınaýdy ótinip aı saıyn keledi eken, alaıda dálel suraǵanda aryzdanýshylar iz-túzsiz joǵalyp ketetin kórinedi.

Eske salsaq, buǵan deıin “Biz birgemiz” qoǵamdyq qaıyrymdylyq qorynyń quryltaıshysy Perızat Qaırat sý tasqynynan zardap shekkenderge jınalǵan 1,5 mıllıard teńgeni jymqyrdy degen kúdikpen ustalǵan edi.