جاڭالىقتار
قاراعاندىداعى تراسسادا 10 كولىك سوقتىعىستى
كوللاج: sn.kz
قاراعاندى وبلىسىنداعى تراسسادا اۋا رايىنىڭ قولايسىزدىعىنان 10 كولىك سوقتىعىستى. وقيعا «استانا – قاراعاندى (اينالما جول) – الماتى» اۆتوجولىنىڭ 1449 شاقىرىمىنداعى «تەمىرتاۋ – قاراعاندى» اۆتوجول ۋچاسكەسىندە 6 ناۋرىز ساعات 16:30-دا بولعان, دەپ حابارلايدى qandastar.kz
الدىن الا دەرەكتەر بويىنشا, زارداپ شەككەندەر جوق. وقيعا ورنىندا جەدەل قىزمەتتەر جۇمىس ىستەپ, ءمان-جايلار ناقتىلانۋدا. ساعات 17:00-دە «تەمىرتاۋ – قاراعاندى» تولەم اقى الۋ ۋچاسكەسىندە بارلىق كولىك تۇرلەرىنىڭ قوزعالىسىنا ۋاقىتشا شەكتەۋ ەنگىزىلدى. جول بەلگىلەرى قولدانىستاعى زاڭناماعا سايكەس ورناتىلدى.
«جول-كولىك وقيعاسىنىڭ الدىن الا سەبەبى – جول قوزعالىسى ەرەجەلەرىن ساقتاماۋ. جۇرگىزۋشىلەرگە ساق بولۋعا, اۋا رايى جاعدايلارىن ەسكەرۋگە جانە جول قىزمەتتەرىنىڭ نۇسقاۋلارىنا باعىنۋعا كەڭەس بەرىلەدى», — دەلىنگەن «قازاۆتوجول» مالىمەتىندە.
