«قاراسازدىقتاردىڭ ارەكەتىن دۇرىس دەپ تاپتىم»: ابزال قۇسپان حالىقتىڭ ازاماتتاردى سوتسىز جازالاۋى تۋرالى ايتتى

“ادامدار قۇقىق قورعاۋ ورگاندارىنىڭ قاۋقارسىزدىعىنان وسىنداي اڭگىمەلەردى (سوتسىز جازالاۋ) كوپ ايتا باستادى دەپ ويلامايسىز با?” دەپ سۇراعان دەپۋتاتتان جۋرناليستەر. ابزال قۇسپان “ارينە” دەپ جاۋاپ بەردى.

– كەشە عانا ماسەلەن, مۇقاعاليدىڭ جاعدايىندا (بلوگەردىڭ اقىن مۇقاعالي ماقاتاەۆتى «سورلى ەركەك» دەپ اتاۋى) مەن مىسالى, مورالدىق تۇرعىدا قاراسازدىقتاردىڭ (اقىننىڭ اۋىلداستارى) ارەكەتىن قولداعان اداممىن. بارشا جان-تانىممەن زاڭگەر رەتىندە زاڭسىز ەكەنىن بىلەم. بىراق مەن قاراسازدىقتاردىڭ ارەكەتىن دۇرىس دەپ تاپتىم. نەگە? سەبەبى قولدانىستاعى زاڭمەن ۇلى تۇلعالارىمىز نەمەسە قازاق حالقىنىڭ ار-نامىسى قورعالماعان.

مىسالى, تۇركيادا تۇرىك حالقىنىڭ ار-نامىسىنا, ابىرويىنا نۇسقان كەلتىرگەنى ءۇشىن اكىمشىلىك جاۋاپكەرشىلىك قاراستىرىلعان. ول دا بولسا جاۋاپكەرشىلىك. تۇرىك حالقىنىڭ ءبىر ۇلى تۇلعالارىنىڭ نامىسىنا تيەتىن بولساڭىز, جاۋاپقا تارتىلاسىز. بىزدە ونداي جاۋاپكەرشىلىك تە جوق. سول سەبەپتى ول جەردە حالىقتا باسقا شارا قالعان جوق, – دەيدى ول.

كەيىنگى كەزدە ەلدە بولىپ جاتقان قىلمىستار قوعامدىق رەزونانس تۋعىزىپ, ەلدەگى ادىلەت ينستيتۋتتارىنىڭ, قۇقىق قورعاۋ ورگاندارىنا كوبىرەك سىن ايتىلا باستاعانى بەلگىلى. تالعارداعى ءجاسوسپىرىمنىڭ ءولىمى دە وسى اڭگىمەنى ۋشىقتىرعان.