Jańalyqtar
«Qarasazdyqtardyń áreketin durys dep taptym»: Abzal Quspan halyqtyń azamattardy sotsyz jazalaýy týraly aıtty
Foto: ashyq derekkóz
Májilis depýtaty Abzal Quspannan búgin Parlament kýlýarynda jýrnalıster sotsyz jazalaý jóninde pikirin surap bildi, dep habarlaıdy Alash.KZ Ulysmedia.kz materıalyna súıenip.
“Adamdar quqyq qorǵaý organdarynyń qaýqarsyzdyǵynan osyndaı áńgimelerdi (sotsyz jazalaý) kóp aıta bastady dep oılamaısyz ba?” dep suraǵan depýtattan jýrnalıster. Abzal Quspan “árıne” dep jaýap berdi.
– Keshe ǵana máselen, Muqaǵalıdiń jaǵdaıynda (blogerdiń aqyn Muqaǵalı Maqataevty «sorly erkek» dep ataýy) men mysaly, moraldyq turǵyda qarasazdyqtardyń (aqynnyń aýyldastary) áreketin qoldaǵan adammyn. Barsha jan-tánimmen zańger retinde zańsyz ekenin bilem. Biraq men qarasazdyqtardyń áreketin durys dep taptym. Nege? Sebebi qoldanystaǵy zańmen uly tulǵalarymyz nemese qazaq halqynyń ar-namysy qorǵalmaǵan.
Mysaly, Túrkııada túrik halqynyń ar-namysyna, abyroıyna nusqan keltirgeni úshin ákimshilik jaýapkershilik qarastyrylǵan. Ol da bolsa jaýapkershilik. Túrik halqynyń bir uly tulǵalarynyń namysyna tıetin bolsańyz, jaýapqa tartylasyz. Bizde ondaı jaýapkershilik te joq. Sol sebepti ol jerde halyqta basqa shara qalǵan joq, – deıdi ol.
Keıingi kezde elde bolyp jatqan qylmystar qoǵamdyq rezonans týǵyzyp, eldegi ádilet ınstıtýttarynyń, quqyq qorǵaý organdaryna kóbirek syn aıtyla bastaǵany belgili. Talǵardaǵy jasóspirimniń ólimi de osy áńgimeni ýshyqtyrǵan.
