كارينا ماماش بۇرىنعى جولداسىنىڭ تۋىسىن دا سوتقا بەرمەك

فوتو:: Tengrinews.kz

ايەلىن سوققىعا جىققانى ءۇشىن سوتتالعان ديپلومات ساكەن ماماشتىڭ بۇرىنعى جارى كارينا ماماش ەكس-كۇيەۋىنىڭ تۋىستارىن سوتقا بەرەتىنىن مالىمدەدى, دەپ حابارلايدى qandastar.kz

ونىڭ ايتۋىنشا, ولار وعان جالا جاۋىپ, الەۋمەتتىك جەلىلەردە ءوز كەلىسىمىنسىز ونىڭ جانە بالالارىنىڭ سۋرەتتەرىن جاريالاپ ءجۇر.

Aikyn.kz جازعانداي, TikTok-تا جاريالانعان ۆيدەودا ساكەن ماماشتىڭ اعاسى نۇرجان ماماش كاريناعا قاتىستى “جالعان ايىپتاۋ” ءۇشىن ارىز تۇسىرگىسى كەلگەنىن, الايدا ساكەننىڭ ءوزى وعان رۇقسات بەرمەگەنىن ايتقان.

كارينا ماماش تۋىستارىنا ۇندەۋ جاساپ:

“قۇرمەتتى نۇرجان ماماش, مەنىڭ اتىما ايتىلعان قورلاۋ مەن جالا جابۋ – جاي عانا حەيت ەمەس, زاڭبۇزۋشىلىق. بارلىق ماتەريالدار تىركەلىپ جاتىر. ەگەر بۇل جالعاسا بەرسە, ءتيىستى ورگاندارعا جۇگىنەمىن. سونىمەن قاتار مەنىڭ جانە بالالارىمنىڭ سۋرەتتەرىن  كەلىسىمىمسىز جاريالاماۋىڭىزدى تالاپ ەتەمىن”, – دەدى.

ول سونداي-اق تۋىستارىنىڭ ارەكەتى جاعدايدى ودان سايىن ۋشىقتىرىپ جاتقانىن ايتىپ, قاجەت بولسا, بارلىق دالەلدەردى سوتتا كورسەتۋگە دايىن ەكەنىن جەتكىزدى.