قارقارالىدا ەسىمدەرىن جارتاسقا جازىپ كەتكەن ءبۇتىن ءبىر وتباسى جازالاندى

قارقارالى تاۋلارىندا ءبىر وتباسى مۇشەلەرىنىڭ ەسىمدەرى جازىلىپ كەتكەن جارتاس انىقتالدى, دەپ حابارلايدى Qandastar.kz

وقيعا ورنىنان تۇسىرىلگەن بەينەجازبا الەۋمەتتىك جەلىدە تارالىپ, جۇرت نارازىلىعىن تۋعىزدى.

پوليتسيانىڭ مالىمەتىنشە, جازۋلاردى قاراعاندىدان كەلگەن وتباسى جازىپ كەتكەن. وتاعاسى – 1977 جىلى تۋعان ەر ادامعا قاتىستى ەكى اكىمشىلىك حاتتاما تولتىرىلدى: ۇساق بۇزاقىلىق جانە ەرەكشە قورعالاتىن تابيعي اۋماقتاردا ءجۇرىپ-تۇرۋ ەرەجەسىن بۇزۋ.

«مۇنداي ارەكەتتەر تابيعي نىساندارعا زيان كەلتىرەدى جانە زاڭ بۇزۋشىلىق بولىپ سانالادى. اتالعان فاكتى بويىنشا ماتەريالدار سوتقا جولدانادى», – دەدى پوليتسيا وكىلدەرى.

ەندى ەر ادام تابيعي نىساندى بۇلدىرگەنى جانە بەلگىلەنگەن ءتارتىپتى بۇزعانى ءۇشىن جاۋاپ بەرەدى.