جاڭالىقتار
كارتوپتىڭ باعاسى نەگە شارىقتاپ كەتتى?
فوتو: اشىق دەرەككوز
ەلىمىزدە كارتوپ باعاسى شارىقتاپ كەتتى. قازىر دۇكەندە 480 تەڭگە, ال بازاردا 380 تەڭگەدەن ساۋدالانىپ جاتىر, دەپ جازدى qandastar.kz
كارتوپقا دەگەن اسا جوعارى سۇرانىس ىشكى نارىققا اسەر ەتكەنى اتاپ ءوتىلدى. ماسەلەن, سوڭعى اپتادا ەكسپورتقا باعىتتالعان وندىرۋشىلەر اراسىندا باعانىڭ كۇرت ءوسۋى (170 تەڭگەدەن 270 تەڭگەگە دەيىن) تىركەلدى. الايدا, اۋىل شارۋاشىلىعى, ساۋدا جانە ينتەگراتسيا مينيسترلىكتەرى ەلدەگى كارتوپ نارىعىنداعى قالىپتاسقان احۋالعا تۇراقتى تۇردە باقىلاۋدى ەندى جۇرگىزىپ جاتىر.
كورشى ەلدەردىڭ, اسىرەسە وزبەكستان تاراپىنان سۇرانىستىڭ ارتۋىنا جانە ەكسپورتتىق باعانىڭ جوعارى بولۋىنا بايلانىستى بيىل كارتوپ ەكسپورتى 1,5 ەسەگە, ياعني 411 مىڭ توننادان 605 مىڭ تونناعا دەيىن ءوستى.
«وسىعان بايلانىستى, ىشكى نارىقتاعى كارتوپ باعاسىن تۇراقتاندىرۋ ماقساتىندا 2025 جىلعى 18 قاڭتاردا وتكەن ساۋدا قىزمەتى ماسەلەلەرى جونىندەگى ۆەدومستۆوارالىق كوميسسيا وتىرىسىندا كارتوپتى ءۇشىنشى ەلدەرگە اكەتۋدى 6 اي مەرزىمگە شەكتەۋ تۋرالى شەشىم قابىلداندى. بۇل شارا ەاەو ەلدەرىنە قولدانىلمايدى, الايدا بۇل باعىتتاعى ەكسپورتقا باقىلاۋ جۇرگىزىلەدى. سونىمەن قاتار قالىپتاسقان جاعدايدى ەسكەرە وتىرىپ, بيىلعى 16 قاڭتاردا ەكسپورتقا فيتوسانيتاريالىق سەرتيفيكاتتار بەرۋ تولىعىمەن توقتاتىلدى», – دەلىنگەن ۇكىمەتتىڭ حابارلاماسىندا.
قابىلدانعان شارالار كارتوپ باعاسىنىڭ تۇراقتىلىعىن قامتاماسىز ەتۋگە, باعانىڭ نەگىزسىز وسۋىنە جول بەرمەۋگە جانە نارىققا قاتىسۋشىلار تاراپىنان الىپساتارلىق ارەكەتتەرگە جول بەرمەۋگە باعىتتالعان.
سونداي-اق ساۋدا جانە ينتەگراتسيا مينيسترلىگىنىڭ اۋماقتىق ورگاندارى مونوپولياعا قارسى ورگاننىڭ اۋماقتىق بولىمشەلەرىمەن بىرلەسە وتىرىپ, جاعدايعا كۇشەيتىلگەن قاداعالاۋ جۇرگىزەدى جانە ساۋدا قىزمەتى ماسەلەلەرى بويىنشا قولدانىستاعى زاڭنامانى بۇزعان جاعدايدا ولار نارىققا قاتىسۋشىلارعا شۇعىل ىقپال ەتۋ شارالارىن قابىلدايدى.
دەسە دە, دۇكەن سورەلەرىندە كارتوپ باعاسى كۇرت ءوسىپ كەتتى. اشم دەرەكتەرى بويىنشا, بۇگىنگى تاڭدا قولدا بار قور 2025 جىلعى ەرتە ەگىن جيناۋ ناۋقانىنا دەيىن ىشكى قاجەتتىلىكتى تولىق جابۋ ءۇشىن جەتكىلىكتى. 19 قاڭتارداعى جاعداي بويىنشا, قورلار ساۋدا جەلىلەرىندەگى قورلاردى ەسەپكە الماعاندا 850 مىڭ توننادان اسادى.
