جاڭالىقتار
«قارىز 4 ميلليارد تەڭگەگە ءوستى: ەكس-مينيستر مۇحامەدي ۇلىنىڭ جۇبايى پرەزيدەنتتەن كومەك سۇرادى
فوتو: ۆيدەودان سكرين
سوتتالعان بۇرىنعى مادەنيەت ءمينيسترى ارىستانبەك مۇحامەدي ۇلىنىڭ ايەلى كۇيەۋى كەلتىرگەن شىعىندى مەملەكەتكە وتەي المايتىنىن مالىمدەدى. سەبەبى, وتباسىنىڭ قارىزى تاعى 4 ميلليارد تەڭگەگە وسكەن. بۇل تۋرالىStan.kzاقپارات اگەنتتىگى حابارلايدى.
مۇحامەدي ۇلىنىڭ جارى عاليا ىسقاقوۆا ۆيدەوۇندەۋ جولداپ, سوت شەشىمدەرىن «زاڭسىزدىق» دەپ اتادى. سونداي-اق پرەزيدەنت قاسىم-جومارت توقاەۆتان كىنالىلەردى جازالاۋدى سۇرادى.
ىسقاقوۆانىڭ ايتۋىنشا, سوت مۇحامەدي ۇلىن مەملەكەتكە كەلتىرىلگەن شىعىندى وتەۋگە مىندەتتەدى. بىراق ول قارىزىن وتەي المايدى. سەبەبى باسقا سوت ونى “ديپلومات” قوناقۇيىنىڭ يەسى قازاقستاندىق سەرىك قارىمساقوۆقا 4 ميلليارد تەڭگە تولەۋگە مىندەتتەگەن. ۇكىمگە سايكەس, مۇحامەدي ۇلى باسقا ىستەرمەن قاتار, وسى قوناقۇيدى باسىپ الۋعا ارەكەتتەنىپ, جارعىلىق كاپيتالدىڭ 29 پايىزىن تارتىپ الۋعا ارەكەتتەنگەنى ءۇشىن سوتتالعان.
ىسقاقوۆا بارىنە سەرىك قارىمساقوۆ پەن ارمان بايقادام ەسىمدى ەكى ازاماتتى كىنالايدى. ول قارىمساقوۆتىڭ «ديپلومات» قوناقۇيىن سوت ارقىلى ەكى رەت ساتىپ, ەكى رەت وزىنە قايتارىپ العانىن العا تارتىپ وتىر.
ونىڭ ايتۋىنشا, 2019 جىلى قارىمساقوۆ قوناقۇيدى 2,5 ميلليارد تەڭگەگە ساتقان. سودان كەيىن ول قوناقۇيدى ساتپاعانىن ايتىپ, سوت ارقىلى م ۇلىكتى قايتارىپ العان.
ءدال وسى ازامات 2020 جىلى اناسىنا قوناقۇي كىرەتىن «اكتەرەك LTD» جشس جارعىلىق كاپيتالىنداعى 71 پايىز ۇلەسىن 2,7 ميلليارد تەڭگەگە ساتىپ جىبەرگەن. ال 2022 جىلى قارىمساقوۆ مۇحامەدي ۇلىنىڭ ۇستىنەن ارىز جازىپ, قوناقۇيدى قايتارىپ العان. قوناقۇيدى وزىنە اۋدارىپ العان قارىمساقوۆ مۇحامەدي ۇلى وتباسىنا 2,7 ميلليارد تەڭگە بەرمەگەن. سوندىقتان ىسقاقوۆا اقشانى قايتارۋ ءۇشىن سوتقا شاعىم تۇسىرگەن. بىراق سوت بارىسىندا كەنەتتەن ونىڭ وتباسىنىڭ ارمان بايقادامعا 4 ميلليارد تەڭگە قارىزى بار ەكەنى بەلگىلى بولدى. بايقادام قارىمساقوۆپەن اقشالاي تالاپتى تاعايىنداۋ تۋرالى كەلىسىمگە قول قويعان. وسىلايشا قارىمساقوۆ عاليا ىسقاقوۆادان, ونىڭ اناسى مەن كۇيەۋىنەن قوماقتى سومانى تالاپ ەتۋ قۇقىعىن العان.
ونىڭ ايتۋىنشا, بۇل وقيعا ويدان قۇراستىرىلعان. سوتتا بايقادام قازاقستاندا بيتكوينداردى اينالىمعا شىعارۋعا تىيىم سالىنعانىمەن, مۇحامەدي ۇلىنا 4 ميلليارد تەڭگە بيتكوين اۋدارعانىن مالىمدەدى.
