قارجاۋباي نۇرىموۆتىڭ وتباسىنا قىسىم كورسەتكەن «دوكتور» سوتقا تارتىلدى

فوتو:ينستاگرام

قارجاۋباي نۇرىموۆتىڭ وتباسىنا جۇيەلى تۇردە قىسىم كورسەتىپ, تىنىشتىعىن بۇزعان ازامات زاڭ الدىندا جاۋاپ بەرەدى. ول الەۋمەتتىك جەلىلەردە «دوكتور» دەگەن لاقاپ اتپەن تانىلعان. بۇل تۋرالى ادۆوكات مەيىرمان شەكەەۆ Instagram-داعى پاراقشاسىندا ايتتى, دەپ حابارلادى qandastar.kz  Ulysmedia.kz-كە سىلتەمە جاساپ.

ءمان-جاي

ادۆوكاتتىڭ ايتۋىنشا, “دوكتور” لاقاپ اتىمەن تانىلعان ازامات قارجاۋباي نۇرىموۆتىڭ وتباسىن ۇزاق ۋاقىت بويى اڭدىپ, ءتۇرلى ارانداتۋشىلىق ارەكەتتەر جاساعان. سوت وتىرىسىندا ادۆوكات مەيىرمان شەكەەۆ بىرنەشە ناقتى تالاپ قويدى.

– جاۋاپكەر ءابدىراحمان باۋىرجاندى سوت شەشىمى زاڭدى كۇشىنە ەنگەن سوڭ بەس كۇن ىشىندە TikTok الەۋمەتتىك جەلىسىندە قارجاۋباي پولات ۇلىنان رەسمي تۇردە كەشىرىم سۇراپ, تەرىسكە شىعارۋدى جانە بۇل كەشىرىم ۆيدەوسىن ءوز پاراقشالارىندا – maskarad778 جانە باسقا دا اككاۋنتتارىندا كەمىندە 30 كۇن بويى اشىق جاريالاپ قويۋعا مىندەتتەۋدى سۇرايمىز, – دەدى ادۆوكات.

سۋديا سوتتا جاۋاپكەردەن كىناسىن مويىندايتىنىن نە مويىندامايتىنىن ناقتىلاۋدى سۇراعاندا, ءابدىراحمان باۋىرجان:

– ايتقانىمدى مويىندايمىن, – دەپ جاۋاپ بەردى.

ودان كەيىن سۋديا تاراپتاردى مەدياتسيا جولىمەن تاتۋلاسۋعا بولا ما دەپ سۇراعان ساتتە, ادۆوكات قارسى تاراپتان تىكەلەي سۇراق قويدى:

– قارجاۋبايدىڭ وتباسىن نە سەبەپتى اڭدىپ ءجۇرسىز? – دەگەن سۇراققا جاۋاپكەر بىلاي دەپ تۇسىنىكتەمە بەردى:

– قازاقستان ازاماتى, قازاق بولعان سوڭ, ول جەردە بولعان ءىستى كورىپ, اشۋلانىپ, سونىڭ ءبارىن ىستەدىم. (…) بۇل – مەنىڭ ازاماتتىق پوزيتسيام. مەن ونى باتىر قىلۋعا جول بەرمەيمىن, – دەدى ول.

ەسكە سالايىق, بۇعان دەيىن شەرزات پولاتتىڭ اكەسى قارجاۋباي نۇرىموۆ سوتتالۋشىلاردان تۇسەتىن مورالدىق وتەماقىنىڭ اقشاسىن بالالار ۇيىنە بەرەتىنىن ايتقان ەدى.