Qarjylyq monıtorıng agenttigi qazaqstandyq týraly aqparat úshin syıaqy taǵaıyndady

Foto: vıdeodan skrın

Qarjy monıtorıng agenttigi kontragentterge 4 mıllıard teńgeden astam somaǵa jalǵan býhgalterlik qujattar jazyp bergen aqtóbelikke izdeý jarııalady. Bul týraly  qandastar.kz Stan.kz aqparat agenttigine silteme jasap habarlaıdy.

Izdeý jarııalanǵan 38 jastaǵy Rýslan Omarov Aqtóbe oblysy, Alǵa qalasynyń týmasy. Ol jumystardy naqty oryndamaı, qyzmet kórsetpeı jáne taýar jóneltpeı, jalǵan shot-faktýralar jazyp bergeni úshin kúdikke ilingen.

2011 jyldan 2013 jylǵa deıin Omarov «Sunkar Logistics» JShS dırektory retinde áreket etken. Osylaısha kontragentterge 4 mıllıard teńgeden astam somaǵa jalǵan býhgalterlik qujattar jazyp bergen.

Memlekettik kirister organdarynyń qorytyndysy boıynsha, tólenbegen salyq túrindegi memleketke keltirilgen zalaldyń jalpy somasy 1,5 mıllıard teńgeden asady.

Eger siz izdestirilip jatqan tulǵanyń ornalasqan jeri týraly qandaı da bir aqparat bilseńiz, myna telefon nómirlerine habarlasýyńyzdy suraımyz:

+7-701-770-08-65 – izdeý boıynsha,
+7-7292-40-36-59 – kezekshi bólim.

Omarov týraly aqparat bergen azamattarǵa syıaqy men anonımdilikke kepil beriledi.

Aıta keteıik, buǵan deıin Qarjy monıtorıngi agenttigi qarjy pıramıdasynyń basshysyna halyqaralyq izdeý jarııalaǵany týraly jazǵan edik.