جاڭالىقتار
كاسىپكەرلىك نىساندارىن كۇشپەن باسىپ العان: الماتىدا ۇيىمداسقان قىلمىستىق توپ قۇرامىنداعى 20 ادام قۇرىقتالدى
الماتى قالاسىندا قىلمىستىق توپقا قاتىسى بار جەكە كۇزەت مەكەمەسىنىڭ زاڭسىز ارەكەتى اشكەرەلەندى. توپتىڭ جەتەكشىسى مەن قاتىسۋشىلارىنا قاتىستى ۇيىمداسقان قىلمىستىق توپ قۇرۋ, وعان باسشىلىق ەتۋ جانە قاتىسۋ دەرەكتەرى بويىنشا سوتقا دەيىنگى تەرگەۋ باستالدى. بۇل تۋرالى Qandastar.kz اقپارات اگەنتتىگى ىشكى ىستەر مينيسترلىگىنە سىلتەمە جاساپ حابارلايدى.
ۆەدومستۆونىڭ اقپاراتتىق مەديا-پورتالىندا جاريالانعان دەرەككە سۇيەنسەك, تەرگەۋ بارىسىندا قىلمىستىق ەلەمەنتتەر شاعىن جانە ورتا بيزنەس نىساندارىن تولىق باقىلاۋعا الۋ ماقساتىندا ويىن-ساۋىق ورىندارىنىڭ باسشىلارى مەن قىزمەتكەرلەرىنە فيزيكالىق جانە مورالدىق قىسىم كورسەتىپ, زاڭسىز ارەكەتتەر جاساعانى انىقتالعان.
كەيىننەن ولار كاسىپكەرلىك نىساندارىن كۇشپەن باسىپ الىپ, سول جەرلەردە «قاۋىپسىزدىك» قىزمەتىن ىسكە اسىرعان.
پوليتسيا تاراتقان مالىمەتكە قاراعاندا, قىلمىستىق توپ مۇشەلەرى الماتى قالاسىندا, جەتىسۋ, تۇركىستان, ماڭعىستاۋ, جامبىل جانە الماتى وبلىستارىندا ۇستالعان, ولاردان قارۋ-جاراق پەن وق-دارىلەر تاركىلەنگەن.
«قىلمىستىق توپتىڭ 20 مۇشەسى قۇرىقتالدى. قىرىقتان استام ءتىنتۋ جۇرگىزىلىپ, 7 اتىس قارۋى تاركىلەندى, ونىڭ ىشىندە 3 كەسىلگەن مىلتىق, ماكاروۆ تاپانشاسى, كالاشنيكوۆ اۆتوماتى جانە 100-دەن استام وق-ءدارى الىندى», – دەپ مالىمدەدى ىىم ۇيىمداسقان قىلمىسقا قارسى كۇرەس دەپارتامەنتىنىڭ وكىلى قۋاندىق الپىس.
ۆەدومستۆو مالىمەتىنشە, قازىر بۇزاقىلىق, بوپسالاۋ, ادام ۇرلاۋ, ءوز بەتىنشە بيلىك جۇرگىزۋ جانە دەنساۋلىققا زيان كەلتىرۋ فاكتىلەرى بويىنشا قىلمىستىق ىستەر تەرگەلىپ جاتىر.
«توپتىڭ جەتەكشىسى مەن قاتىسۋشىلارىنا قاتىستى ۇيىمداسقان قىلمىستىق توپ قۇرۋ, وعان باسشىلىق ەتۋ جانە قاتىسۋ دەرەكتەرى بويىنشا سوتقا دەيىنگى تەرگەۋ باستالدى. كۇدىكتىلەردىڭ باسقا دا ۇقساس قىلمىستارعا قاتىسى بار-جوعى تەكسەرىلىپ جاتىر», – دەلىنگەن حابارلامادا.
ىشكى ىستەر مينيسترلىگى وكىلدەرى بيزنەسكە قىسىم كورسەتۋ جانە وعان قىلمىستىق ارالاسۋ ارەكەتتەرى فاكتىلەرى مەملەكەت باقىلاۋىندا ەكەنىن, كەز كەلگەن زاڭسىز ارەكەت زاڭ شەڭبەرىندە قاتاڭ تۇردە توقتاتىلاتىنىن اتاپ ءوتتى.
