Kásipkerlik nysandaryn kúshpen basyp alǵan: Almatyda uıymdasqan qylmystyq top quramyndaǵy 20 adam quryqtaldy

Almaty qalasynda qylmystyq topqa qatysy bar jeke kúzet mekemesiniń zańsyz áreketi áshkerelendi. Toptyń jetekshisi men qatysýshylaryna qatysty uıymdasqan qylmystyq top qurý, oǵan basshylyq etý jáne qatysý derekteri boıynsha sotqa deıingi tergeý bastaldy. Bul týraly Qandastar.kz aqparat agenttigi ishki ister mınıstrligine silteme jasap habarlaıdy.

Vedomstvonyń aqparattyq medıa-portalynda jarııalanǵan derekke súıensek, tergeý barysynda qylmystyq elementter shaǵyn jáne orta bıznes nysandaryn tolyq baqylaýǵa alý maqsatynda oıyn-saýyq oryndarynyń basshylary men qyzmetkerlerine fızıkalyq jáne moraldyq qysym kórsetip, zańsyz áreketter jasaǵany anyqtalǵan.

Keıinnen olar kásipkerlik nysandaryn kúshpen basyp alyp, sol jerlerde «qaýipsizdik» qyzmetin iske asyrǵan.

Polıııa taratqan málimetke qaraǵanda, qylmystyq top músheleri Almaty qalasynda, Jetisý, Túrkistan, Mańǵystaý, Jambyl jáne Almaty oblystarynda ustalǵan, olardan qarý-jaraq pen oq-dáriler tárkilengen.

«Qylmystyq toptyń 20 múshesi quryqtaldy. Qyryqtan astam tintý júrgizilip, 7 atys qarýy tárkilendi, onyń ishinde 3 kesilgen myltyq, Makarov tapanshasy, Kalashnıkov avtomaty jáne 100-den astam oq-dári alyndy», – dep málimdedi IIM uıymdasqan qylmysqa qarsy kúres departamentiniń ókili Qýandyq Alpys.

Vedomstvo málimetinshe, qazir buzaqylyq, bopsalaý, adam urlaý, óz betinshe bılik júrgizý jáne densaýlyqqa zııan keltirý faktileri boıynsha qylmystyq ister tergelip jatyr.

«Toptyń jetekshisi men qatysýshylaryna qatysty uıymdasqan qylmystyq top qurý, oǵan basshylyq etý jáne qatysý derekteri boıynsha sotqa deıingi tergeý bastaldy. Kúdiktilerdiń basqa da uqsas qylmystarǵa qatysy bar-joǵy tekserilip jatyr», – delingen habarlamada.

Ishki ister mınıstrligi ókilderi bızneske qysym kórsetý jáne oǵan qylmystyq aralasý áreketteri faktileri memleket baqylaýynda ekenin, kez kelgen zańsyz áreket zań sheńberinde qatań túrde toqtatylatynyn atap ótti.