كاسپي تەڭىزىنەن جاڭا مۇناي داعى انىقتالدى

سپۋتنيك سۋرەتتەرىندە كاسپي تەڭىزىنىڭ بەتىندە كولەمى 0,4 شارشى شاقىرىم بولاتىن مۇناي داعى بايقالدى. لاستانۋ قازاقستان, ازەربايجان جانە تۇرىكمەنستان سۋلارىنا تاراپ ۇلگەرگەن, دەپ حابارلايدى Qandastar.kz

ەكولوگتاردىڭ مالىمەتىنشە, بۇل مۇناي داعى كەمەدەن زاڭسىز توگىلگەن قالدىقتان پايدا بولۋى مۇمكىن.

ساراپشىلاردىڭ ايتۋىنشا, ءبىر عانا كەمەنىڭ ارەكەتى تۇتاس تەڭىزگە قاۋىپ ءتوندىرىپ وتىر. تەڭىزدى قورعاۋعا باعىتتالعان نەگىزگى حالىقارالىق قۇجات – مارپول كونۆەنتسياسى. ول مۇناي, حيميكاتتار, قوقىس پەن اۋاعا تارالاتىن زياندى شىعارىندىلاردى شەكتەۋدى مىندەتتەيدى.

كاسپي تەڭىزى رەسمي تۇردە «ەرەكشە قورعالاتىن ايماق» مارتەبەسىنە يە بولماسا دا, جاعالاۋداعى ەلدەر بۇل ەرەجەلەردى ورىنداۋعا ءتيىس. سونىمەن قاتار, 2003 جىلى كاسپي ماڭىنداعى مەملەكەتتەر تەگەران كونۆەنتسياسىنا قول قويعان.

قۇجاتقا سايكەس, ەلدەر تەڭىزدى قورعاۋ, لاستانۋدىڭ الدىن الۋ جانە ونى باقىلاۋ شارالارىن قابىلداۋعا مىندەتتى. قازاقستان زاڭناماسىندا دا تەڭىزگە كەمە قالدىقتارىن توگۋگە تىيىم سالىنعان.

دەگەنمەن, كاسپيدىڭ بەتىندە پايدا بولعان مۇناي داعى زاڭداردىڭ ورىندالۋىنا قاتىستى كۇمان تۋدىرىپ وتىر. بۇل جاعداي تەڭىزدىڭ ەكولوگيالىق قاۋىپسىزدىگىنە قاتىستى حالىقارالىق جانە ۇلتتىق باقىلاۋدىڭ قانشالىقتى ءتيىمدى ەكەنىن قايتا قاراۋدى تالاپ ەتەدى.