«قاسىمباەۆ رەزونانستىڭ قۇربانى»: ادۆوكاتتار سوت پروتسەسىنىڭ بىرجاقتى ءجۇرىپ جاتقانىن ايتتى

فوتو: سكرين

الماتىدا وتكەن ءباسپاسوز ءماسليحاتىندا حاسان قاسىمباەۆتىڭ قورعاۋشىلارى ىستەگى زاڭبۇزۋشىلىقتاردى اتاپ ءوتىپ, ونى قوعامدىق رەزونانسقا بايلانىستى قۋدالاپ جاتقانىن مالىمدەدى, دەپ حابارلايدى    qandastar.kz  Kursiv.kz-كە سىلتەمە جاساپ. 

ادۆوكات گۇلميرا باباجانوۆانىڭ سوزىنشە, العاشقى سوت وتىرىسى اشىق وتكەن, باق وكىلدەرى قاتىسقان. بىراق كەيىن جۋرناليستەردى باسقا زالعا اۋىستىرىپ, پروتسەسكە تولىققاندى قاتىسۋ مۇمكىندىگىنەن ايىرعان.

«بۇل – سوت تالقىلاۋىنىڭ جاريالىلىعىن ورەسكەل بۇزۋ», — دەدى ول.

قوعامدىق قورعاۋشى قۋات اۋعانبەك ءىستىڭ تەك ايىپتاۋ باعىتىمەن ءجۇرىپ جاتقانىن ايتادى. ونىڭ سوزىنشە, قاسىمباەۆتى ۇيىمداسقان قىلمىستىق توپ جەتەكشىسى دەپ ايىپتايتىنداي ناقتى دالەل جوق.

«بار بولعانى رەزونانسقا سۇيەنىپ, ەش دالەلسىز ادام تاعدىرىن شەشىپ وتىر. حاسان قاسىمباەۆ جالعان اقپارات پەن قوعامدىق قىسىمنىڭ قۇربانى بولىپ وتىر», — دەدى ول.

ادۆوكات ەرلان مەندەشەۆ قاسىمباەۆقا قاتىستى قىلمىستىق ءىستىڭ 2021 جىلى دالەل بولماۋىنا بايلانىستى توقتاتىلعانىن, كەيىن شەرزات ىسىنەن تۋعان رەزونانسقا بايلانىستى قايتا قوزعالعانىن ايتتى.

ء«ىستى مۇراعاتتان شىعارارداي ەشقانداي جاڭا ءمان-جاي بولعان جوق», — دەيدى ول.

مەندەشەۆتىڭ ايتۋىنشا, سوتقا دەيىنگى تەرگەۋدە زاڭبۇزۋشىلىقتار تىركەلگەن. جابىرلەنۋشى تاراپ تەرگەۋ دەرەكتەرىن جاريالاماۋ تۋرالى قولحات بەرگەنىنە قاراماستان باق-قا سۇقبات بەرگەن. سونىمەن بىرگە ادۆوكات قاسىمباەۆ پەن وزگە كۇدىكتىلەرگە قىسىم جاسالعانىن, ارنايى جاساق قىزمەتكەرلەرى جاۋاپ الۋ كەزىندە ازاپتاۋعا بارعانىن مالىمدەدى.

قورعاۋشىلار جابىرلەنۋشى ارمان ءالىموۆتىڭ كورۋ قابىلەتىن جوعالتۋى كاسىبي سپورتتاعى سوققىلاردىڭ سالدارى بولۋى مۇمكىن ەكەنىن العا تارتتى. ادۆوكات باباجانوۆا بۇل دەرەكتەردى ىسكە تىركەۋدى سۇراعانىمەن, سوت قابىلداماعان. ال قۋات اۋعانبەك جابىرلەنۋشىگە قاتىستى قوعامدا جالعان وبراز قالىپتاسقانىن, ونىڭ تۇرمىستىق زورلىق پەن ەسىرتكىگە قاتىستى ىستەر بويىنشا قىلمىستىق جاۋاپكەرشىلىككە تارتىلعانىن جەتكىزدى.

ايتا كەتەيىك, تالعاردا حاسان قاسىمباەۆقا قاتىستى سوت پروتسەسى ءجۇرىپ جاتىر. ول ادام ۇرلاۋ, قاساقانا اۋىر دەنە جاراقاتىن كەلتىرۋ جانە بوپسالاۋ باپتارى بويىنشا ايىپتالۋدا.