الەم جاڭالىقتارى
كاتار ترامپقا 400 ميلليون دوللارلىق «ۇشاتىن ساراي» سىيعا تارتپاق
فوتو: Ben Curtis/AP
دونالد ترامپتىڭ اكىمشىلىگى كاتار كورولدىك وتباسىنان Boeing 747-8 ۇلگىسىندەگى ءسان-سالتاناتتى ۇشاقتى سىيعا الۋعا دايىندالىپ جاتىر. بۇل اقش پرەزيدەنتى دونالد ترامپ ءوز وكىلەتتىگى اياقتالعانعا دەيىن «بورت ءنومىرى ءبىرىنشى» رەتىندە قولدانا الاتىن ۇشاق, دەپ جازدى qandastar.kz
بۇل تۋرالىStan.kz اقپارات اگەنتتىگى ABC News پورتالىنا سىلتەمە جاساپ حابارلايدى.
بۇدان كەيىن ۇشاق ترامپتىڭ پرەزيدەنتتىك كىتاپحاناسىنىڭ قورىنا تاپسىرىلادى. بۇل سىيلىق جايلى رەسمي حابار ترامپتىڭ كاتارعا ساپارى كەزىندە, ياعني ونىڭ ەكىنشى پرەزيدەنتتىك مەرزىمىندەگى العاشقى شەتەلدىك ساپارى اياسىندا جاريالانادى دەپ كۇتىلگەن. الايدا اق ءۇيدىڭ جوعارى لاۋازىمدى شەنەۋنىگى قازىرگى ساپار بارىسىندا سىيلىق تابىستالمايتىنىن ناقتىلادى.
جەكسەنبى كەشىندە دونالد ترامپ الەۋمەتتىك جەلىدە ءوزىنىڭ اكىمشىلىگى بۇل ۇشاقتى قابىلداۋعا دايىندالىپ جاتقانىن راستادى جانە بۇل ۇدەرىستى «وتە اشىق جانە ايقىن مامىلە» دەپ اتادى. سونىمەن قاتار ول بۇل كەلىسىم قورعانىس مينيسترلىگىمەن بىرلەسە جۇزەگە اسىرىلىپ جاتقانىن ايتتى.
ترامپ بۇل «ۇشاتىن سارايدى» بيىل اقپاندا ۋەست-پالم-بيچ حالىقارالىق اۋەجايىندا تۇرعان كەزدە ءوز كوزىمەن كورىپ شىققان. ۇشاقتىڭ ىشكى كورىنىسى وتە باي ءارى ءساندى بەزەندىرىلگەنى سونشالىق, ول «ۇشاتىن ساراي» دەگەن اتاۋعا يە بولعان.
اق ءۇيدىڭ زاڭ كەڭەسشىلەرى مەن ادىلەت مينيسترلىگى ماماندارى قورعانىس ءمينيسترى پيت حەگسەتكە ارنايى قورىتىندى ۇسىنىپ, قورعانىس مينيسترلىگى بۇل ۇشاقتى سىيلىق رەتىندە قابىلداپ, كەيىن ونى ترامپتىڭ پرەزيدەنتتىك كىتاپحاناسىنا بەرۋىنە بولادى دەگەن تۇجىرىم جاساعان. ولاردىڭ ايتۋىنشا, بۇل ارەكەت اقش كونستيتۋتسياسىنداعى emoluments clause – ياعني شەتەل بيلەۋشىلەرىنەن نەمەسە مەملەكەتتەرىنەن سىيلىق الۋعا تىيىم سالاتىن تارماقتى بۇزبايدى جانە پاراقورلىققا قارسى زاڭدارعا قايشى كەلمەيدى.
اق ءۇيدىڭ ءباسپاسوز حاتشىسى كەرولاين لەۆيتت ABC News اگەنتتىگىنە پىكىر ءبىلدىردى.
«كەز كەلگەن شەتەل مەملەكەتىنىڭ سىيلىعى قولدانىستاعى بارلىق زاڭعا تولىقتاي سايكەس تۇردە قابىلدانادى», – دەپ ءتۇسىندىردى ءباسپاسوز حاتشىسى.
ەسكە سالايىق, بۇعان دەيىن استاناداعى حقكو-دا رەسەيلىك پروديۋسەرگە كورسەتىلگەن قۇرمەت جەلىدەگىلەردى اشۋلاندىردى. «ازاماتتارعا ارنالعان ۇكىمەت» مەملەكەتتىك كورپوراتسياسىنىڭ ءباسپاسوز قىزمەتى رەسەيلىك پروديۋسەر يانا رۋدكوۆسكايانىڭ استاناداعى حالىققا قىزمەت كورسەتۋ ورتالىعىنا (حقكو) كەلگەنى تۋرالى جازبا جاريالادى. جاريالانعان ۆيدەودان رۋدكوۆسكايانى مەملەكەتتىك كورپوراتسيا باسقارما توراعاسى ارمان كەنجەعاليەۆتىڭ ءوزى جەكە قارسى العانىن كورۋگە بولادى.
