«قاتەلىك جاسادىق»: يراكتا ءومىر بويىنا سوتتالعان قازاق ايەلدەر ەل ۇكىمەتىنەن كومەك سۇرادى

يراكتا ءومىر بويىنا باس بوستاندىعىنان ايىرىلعان التى ايەل ەل ۇكىمەتىنەن كومەك سۇراپ, قازاقستانعا قايتارۋدى سۇرايدى. ولار جازاسىن يراك استاناسى باعدات قالاسىنداعى تۇرمەدە 8 جىلدان بەرى جازاسىن وتەپ جاتىر, دەپ حابارلايدى qandastar.kz اقپارات پورتالى كۋرسيۆ مەديا باسىلىمىنا سىلتەمە جاساپ.

«ۆوزدۋح سۆوبودى» قوعامدىق قورىنىڭ جەتەكشىسى جاننا ۋميروۆانىڭ ايتۋىنشا,  بۇل ايەلدەر 2021 جىلدان بەرى اۋىر جاعدايدا قالعان. ولار «جازىقسىز» ەكەنىن العا تارتىپ, بوستاندىققا شىعارۋدى تالاپ ەتىپ, تۇرمەدە اشتىق جاريالاپتى. جاعدايلارى ناشارلاپ كەتكەن. تۇرمە اكىمشىلىگى ولارعا مەديتسينالىق كومەك كورسەتپەپتى.

«2024 جىلدىڭ قازان ايىنان بەرى ءبىز بۇل ايەلدەردىڭ ۇستىنەن قوزعالعان قىلمىستىق ىستەردى قايتا قاراۋ ءۇشىن جۇمىس جۇرگىزىپ جاتىرمىز. 2017 جىلى دۇربەلەڭ جىلى بولدى. كوپ نارسە تۇسىنىكسىز بولدى. جاستارىمىزدىڭ دەنى اداستى. ء«دىنى ءۇشىن قىسپاققا تۇسپەيتىن مەملەكەتتى» ىزدەدى. بىراق ولار ۇلكەن بالەگە تاپ بولدى», – دەيدى جاننا ۋميروۆا.

ونىڭ سوزىنە قاراعاندا, بيلىك وكىلدەرى وتانداستارىمىزدى ەلگە قايتارۋعا كۇش سالاتىنىن, باس پروكۋراتۋرانىڭ سەگىز جىلدان بەرى بۇل ىسپەن اينالىسىپ جاتقانىن ايتقان. بىراق جاننا ۋميروۆا بۇعان كۇمان كەلتىرىپ وتىر. ول «بۇل ايەلدەردى دايش-ءتىڭ جاقتاستارى» دەپ قاراۋعا بولمايتىنىن ايتادى.

استانادا وتكەن ءباسپاسوز ءماسليحاتى كەزىندە يراك تۇرمەسىندە جاتقان ايەلدەردىڭ بەينەۇندەۋى كورسەتىلدى.

ء«بىز قاتەلىك جاساعانىمىزدى تۇسىنەمىز. ءبىز سوعىسۋعا ەمەس, كۇيەۋلەرىمىزبەن بىرگە ەرىپ كەلگەن ەدىك. وتانىمىزعا, تۋىستارىمىزعا ورالىپ, جاڭا ءومىر باستاۋعا كومەكتەسۋلەرىڭىزدى سۇرايمىز», – دەلىنگەن ۇندەۋدە.

ورالدىق سوتتالعان قىزدىڭ ءبىرى روزا مانسۇروۆانىڭ اناسى ءمارزيا مەدەتوۆا قارتايعان شاعىندا نەمەرەلەرىن جالعىز باعىپ وتىرعانىن ايتتى.

«2013 جىلى ولار بالالارىن الىپ ەلدەن كەتىپ قالدى. 2019 جىلى ءۇش بالانى اكەلىپ بەردى. سولاردى قازىر باعىپ وتىرمىن. قىزىمىزبەن بايلانىسىپ تۇرامىز. باسقا قىزداردىڭ كوبىنىڭ اتا-اناسى كەلە المادى. بارلىق اتا-انالاردىڭ اتىنان جان ايقايىمىزدى جەتكىزگىم كەلەدى», – دەپ, ول قىزىن ەلگە قايتارۋعا مەملەكەتتەن اراشا ءتۇسۋدى سۇرادى.

جاننا ۋميروۆانىڭ ايتۋىنشا, التى ايەل سيرياعا ءار ەل ارقىلى جەتكەن. ءبىرى – رەسەي ارقىلى, ءبىرى ازەربايجان ارقىلى ۇشقان. ول كەزدە جاستارى ون سەگىز, ون توعىزدا عانا بولعان جاس كەلىنشەكتەر كۇيەۋلەرىنىڭ سوڭىنان سوزگە كەلمەي ىلەسىپ كەتە بارعان ەكەن.

ادۆوكات جامبىل جولگەلديەۆتىڭ ايتۋىنشا, يراك بيلىگى قازاق ايەلدەردى «تەرروريزمگە جاردەم بەردى» دەپ ءومىر بويى باس بوستاندىعىنان ايىرعان.

«بىراق, ولاردىڭ تەرروريستەرگە كومەكتەسۋ نيەتى بولماعان» – دەيدى ادۆوكات.