«قاتتى ۇرىستىم»: تانىمال اكتريسا ەنەسىمەن اراسى قالاي ەكەنىن ايتىپ بەردى

تانىمال اكتريسا اقەركە ارىس 7-ارناداعى «جارقىراعان جۇلدىز» باعدارلاماسىندا ەنەسىمەن قارىم-قاتىناسى تۋرالى شىنايى ويلارىمەن ءبولىستى. ول كەلىن مەن ەنە اراسىنداعى سىيلاستىق دۇرىس قويىلعان شەكارادان باستالاتىنىن ايتتى, دەپ حابارلايدى qandastar.kz اقپارات پورتالى. 

«شىنىمدى ايتسام, ەنەممەن قاتتى ۇرىستىم. قاتتى رەنجىستىم. وتە جاقىن دا بولدىم. كۇلدىم دە, قۇربى دا بولدىم. قىزى دا بولدىم, كەلىنى دە بولدىم. بىراق “كەلىندى قىزىمداي كورەمىن” دەگەنگە قارسىمىن. اركىم ءوز ورنىندا بولۋى كەرەك. وتىرىك ىستەمەۋ كەرەك. كەلىن بە? كەلىن! قىزىڭ با? قىزىڭ! ەنە مە? ەنە! سىيلاستىق پەن شەكارا بولۋى كەرەك», – دەدى اكتريسا.

اقەركەنىڭ ايتۋىنشا, ولار ەنەسىمەن ءۇش جىل بىرگە تۇرعان. قازىر بولەك تۇرىپ جاتقاندارىنا ءبىر جىل بولعان. اكتريسانىڭ پىكىرىنشە, بولەك تۇرۋ جاس وتباسىعا ۇلكەن تاجىريبە بەرەدى.

«ەنەممەن ءۇش جىل بىرگە تۇردىق. قازىر بولەك تۇرىپ جاتقانىمىزعا ءبىر جىل بولدى. ەنەڭمەن تۇرعاننىڭ ءبىر جاقسىسى — بىلمەگەنىڭدى ۇيرەتەدى. قيىندىقتاردا ۇلكەن ادامنىڭ بولۋى جەڭىل. بىراق اتا-انا بالاسىنىڭ ەسەيۋى ءۇشىن ونى بولەك شىعارۋى كەرەك دەپ ويلايمىن. بىرگە تۇرعاندا, ۇنەمى اقىلداسۋ كەرەك دەگەن وي تۇرادى», – دەدى اقەركە ارىس.