«قاۋىپسىزدىگىمىزدى كىم ويلايدى»: الماتىلىق تۇرعىندار پىشاق ۇستاپ, پاتەرلەردىڭ ەسىگىن قاققان ەر ادامنىڭ بوستاندىقتا جۇرگەنىنە اشۋلى

فوتو:لاۋرا قانايبەكوۆا جىبەرگەن ۆيدەو كادرلارىنان سكرين

الماتىداعى شۇعىلا اۋدانىندا “الما سيتي” تۇرعىن ۇيىندە جۇرتشىلىق قولىنا پىشاق ۇستاپ, پاتەرلەردىڭ ەسىگىن قاققان ەر ادامنىڭ بوستاندىقتا جۇرگەنىن ايتىپ شاعىمداندى, دەپ جازدى qandastar.kz

تۇرعىندار ماس كۇيدە جۇرگەن ونىڭ ءتىپتى ليفتىدە تۇرعىننىڭ بىرىنە شابۋىلداعانىن دا كورگەن. پوليتسيا شاقىرعان كەزدە ونىڭ پاتەرىنىڭ ەسىك الدىنان ەكى پىشاق تابىلعان. الايدا ونى قۇقىق قورعاۋ قىزمەتكەرلەرى قىلمىس بولماعاندىقتان تەك ءۇش ساعات قاماۋعا الىپ جىبەرىپ قويعان. بۇل تۋرالى Stan.kz اقپارات اگەنتتىگى حابارلايدى.

وقيعا 17 ساۋىردە ساعات 20:00 شاماسىندا بولعان. شۇعىلا شاعىن اۋدانىنىڭ تۇرعىنى لاۋرا قانايبەكوۆا Stan.kz تىلشىسىنە قازىر تۇرعىنداردىڭ ءبارى كىرىپ-شىعۋعا قورقىپ جۇرگەنىن ايتتى.

ء“بارىمىز ءبىر پودەزد, ءبىر ليفتپەن جۇرەمىز. نەگىزى بۇل كىسىنى كۇندىز كورگەنمىن. قابىرعالاس كورشى بولعان سوڭ, “سۋىق سۋ بار ما” دەپ سۇرادى. ودان الكوگولدىڭ ءيىسى شىعىپ تۇرسا دا, كەشە ءىشىپ ءيىسى كەتپەگەن شىعار دەپ جامان ويلامادىم. سوسىن سۋىق سۋ تۋرالى بىلمەيتىنىمدى ايتتىم.

كەيىن سۋىق سۋ ىسكە قوسىلدى. مەن ۇيدەن قوناقتارىمدى شىعارىپ سالعاننان كەيىن كەشكە ساعات 20:00-دە جاڭاعى 57 پاتەردىڭ تۇرعىنى قولىندا قارا پىشاعى بار ەسىكتى قاتتى قاقتى. قايتا اللا ساقتاپ, ەسىكتى اشىپ جىبەرمەي, ەسىكتىڭ كوزشەسىنەن (گلازوگىنان) قارادىم”, – دەدى لاۋرا.

لاۋرا قاتتى قورىققاننان پوليتسەيلەردى شاقىرعانىن ايتتى.

“پوليتسەيلەر كەلگەن سوڭ ماعان ارىز جازۋ ءۇشىن سىرتقا شىعۋىمدى سۇرادى. ال مەن ءوزىم قورقىپ تۇرعانىمدى, ۇيىمنەن شىعا الماي وتىرعاندىقتان ولاردىڭ كومەگىنە جۇگىنىپ تۇرعانىمدى ايتىپ, ىشتەي قاتتى اشۋلاندىم. كەيىن پوليتسەيلەردىڭ وزدەرى 8-قاباتقا كوتەرىلىپ, جاڭاعى كىسىنىڭ پاتەرىن اشقان كەزدە ەسىك الدىندا ەكى پىشاق جاتتى. مەنىڭ ءتۇرىمدى كورمەسىن دەپ پاتەرىمنەن شىقپاي وتىردىم.

الايدا پوليتسەيلەر ەش قىلمىس بولماعاندىقتان ونىڭ ۇستىنەن ءىس قوزعاي المايتىندارىن ايتتى. 3 ساعات قاماۋدا ۇستاپ جىبەرىپ قويىپتى. سوندا ءبىز وسى ادامدارمەن قالاي قورىقپاي ءومىر سۇرەمىز? قولىنا پىشاق ۇستاپ كەلىپ تۇرعان ادامنىڭ توناۋ, نە زورلاۋ, ءولتىرۋ وي بولادى عوي. مىناۋ سۇمدىق قوي! كورشىلەس ەسىكتە تۇراتىندىقتان وتە قورقىنىشتى. قاۋىپسىزدىگىمىزدى كىم ويلايدى سوندا? مىندەتتى تۇردە قاندى وقيعا بولۋ كەرەك پە?!” – دەپ قوستى ول.

تۇرعىندار كۇندىز بۇل كىسىنىڭ قولىنداعى پىشاعىمەن ليفتتەگى ادامعا شابۋىلداعانىن دا كورگەن.

وسى ماسەلەگە وراي Stan.kz تىلشىسى الماتى قالاسىنىڭ پوليتسيا دەپارتامەنتىنەن پىكىر سۇرادى.

“قوڭىراۋ كەلىپ تۇسكەن سوڭ, پوليتسيا قىزمەتكەرلەرى وقيعا ورنىنا جەدەل جەتتى. ەر ادام ناۋرىزباي اۋداندىق پوليتسيا باسقارماسىنا جەتكىزىلىپ, وعان قاتىستى اقبك-ءنىڭ 440-بابى (قوعامدىق ورىندا الكوگولدىك ماساڭ كۇيدە) بولعانى ءۇشىن جانە اقبك-ءنىڭ 434-بابى 1 بولىگى (ۇساق بۇزاقىلىق) بويىنشا اكىمشىلىك حاتتامالار تولتىرىلدى.

ماتەريالدار بەلگىلەنگەن تارتىپپەن شەشىم قابىلداۋ ءۇشىن سوتقا جولداندى. الماتى پوليتسياسى, ازاماتتاردىڭ قاۋىپسىزدىگى ءبىزدىڭ باستى مىندەتىمىز ەكەنىن اتاپ كورسەتەدى. اربىر جاعدايدا بارلىق ءمان-جايلاردى ەسكەرە وتىرىپ, ارەكەتتەرگە قۇقىقتىق باعا بەرىلەدى”, – دەلىنگەن حابارلامادا.