قازا تاپقاندار بار: تۇركيادا تاعى دا قۋاتتى جەر سىلكىنىسى بولدى

تۇركيانىڭ وڭتۇستىك-باتىسىنداعى مۋگلا پروۆينتسياسىندا تۇنگى ساعات 02:17-دە 5,8 ماگنيتۋدالى جەر سىلكىنىسى تىركەلدى. بۇل تۋرالى تۇركيانىڭ ىشكى ىستەر ءمينيسترى الي ەرليكايا مالىمدەدى, دەپ جازادى Qandastar.kz اقپارات پورتالى. 

جەراستى دۇمپۋلەرى كورشىلەس وڭىرلەردە دە سەزىلگەن. ءزىلزالانىڭ ەپيتسەنترى مارمارا قالاسىنان 10 شاقىرىمداي قاشىقتىقتا, 67,9 شاقىرىم تەرەڭدىكتە ورنالاسقان.

ءمينيستردىڭ ايتۋىنشا, تابيعي اپات سالدارىنان 14 جاستاعى قىز كوز جۇمدى. جالپى 69 تۇرعىن ءتۇرلى دەڭگەيدەگى جاراقات العان. ولاردىڭ ءبىر بولىگىنە العاشقى كومەك وقيعا ورنىندا كورسەتىلسە, سەگىز ادام امبۋلاتوريالىق ەمنەن كەيىن ۇيلەرىنە جىبەرىلگەن. قالعان 46 ازامات اۋرۋحانالاردا دارىگەرلەردىڭ باقىلاۋىندا.

مۋگلا گۋبەرناتورى يدريس اكبىيىكتىڭ حابارلاۋىنشا, جەر سىلكىنىسىنەن تۇرعىن ۇيلەر قيراماعان. دەگەنمەن ۇرەيگە بوي الدىرعان كەيبىر ادامدار تەرەزەدەن سەكىرىپ, جاراقات العان.

قازىر وقيعا ورنىندا توتەنشە جاعدايلار قىزمەتى مەن جەرگىلىكتى بيلىك وكىلدەرى جاعدايدى باقىلاۋعا الىپ, ءتيىستى جۇمىستاردى جۇرگىزىپ جاتىر.

ايتا كەتەيىك, مۋگلا — جەرورتا جانە ەگەي تەڭىزدەرىنىڭ تۇيىسكەن تۇسىندا ورنالاسقان, تۇرىك ريۆەراسىنىڭ تانىمال كۋرورتتى ايماعى. مۇندا جاز مەزگىلىندە تۋريستەر كوپ شوعىرلانادى.

ەسكە سالساق, بۇعان دەيىن 23 ساۋىردە ءمارمار تەڭىزىندە 6,2 ماگنيتۋدالى جەر سىلكىنىسى بولىپ, 236 ادام جاراقات العان ەدى. الايدا ول كەزدە ادام شىعىنى مەن اۋقىمدى قيراندىلار تىركەلمەگەن.