Qaza tapqandar bar: Túrkııada taǵy da qýatty jer silkinisi boldy

Túrkııanyń ońtústik-batysyndaǵy Mýgla provınııasynda túngi saǵat 02:17-de 5,8 magnıtýdaly jer silkinisi tirkeldi. Bul týraly Túrkııanyń ishki ister mınıstri Alı Erlıkaıa málimdedi, dep jazady Qandastar.kz aqparat portaly. 

Jerasty dúmpýleri kórshiles óńirlerde de sezilgen. Zilzalanyń epıentri Marmara qalasynan 10 shaqyrymdaı qashyqtyqta, 67,9 shaqyrym tereńdikte ornalasqan.

Mınıstrdiń aıtýynsha, tabıǵı apat saldarynan 14 jastaǵy qyz kóz jumdy. Jalpy 69 turǵyn túrli deńgeıdegi jaraqat alǵan. Olardyń bir bóligine alǵashqy kómek oqıǵa ornynda kórsetilse, segiz adam ambýlatorııalyq emnen keıin úılerine jiberilgen. Qalǵan 46 azamat aýrýhanalarda dárigerlerdiń baqylaýynda.

Mýgla gýbernatory Idrıs Akbyıyktyń habarlaýynsha, jer silkinisinen turǵyn úıler qıramaǵan. Degenmen úreıge boı aldyrǵan keıbir adamdar terezeden sekirip, jaraqat alǵan.

Qazir oqıǵa ornynda tótenshe jaǵdaılar qyzmeti men jergilikti bılik ókilderi jaǵdaıdy baqylaýǵa alyp, tıisti jumystardy júrgizip jatyr.

Aıta keteıik, Mýgla — Jerorta jáne Egeı teńizderiniń túıisken tusynda ornalasqan, Túrik rıverasynyń tanymal kýrortty aımaǵy. Munda jaz mezgilinde týrıster kóp shoǵyrlanady.

Eske salsaq, buǵan deıin 23 sáýirde Mármár teńizinde 6,2 magnıtýdaly jer silkinisi bolyp, 236 adam jaraqat alǵan edi. Alaıda ol kezde adam shyǵyny men aýqymdy qırandylar tirkelmegen.