قازاق كينوسىنىڭ كۇندەرى قاراعاندىدان باستالدى

فوتو: كينو ورتالىعى

ۇلتتىق كينونى قولداۋ ورتالىعى ەلىمىزدىڭ تۇكپىر-تۇكپىرىندە قازاق كينوسىنىڭ ون كۇندىگىن وتكىزەتىنىن حابارلايدى. شارا اياسىندا كورەرمەندەرگە قر مادەنيەت جانە اقپارات مينيسترلىگىنىڭ, سونداي-اق كينو ورتالىعىنىڭ قولداۋىمەن تۇسىرىلگەن بىرقاتار فيلم ۇسىنىلادى. العاشقى كورسەتىلىم قاراعاندى وبلىسىنداعى «سارىجايلاۋ» كينوتەاترىندا وتكىزىلدى, ەندىگى كەزەكتە شارا وزگە قالالار مەن اۋىلدىق وكرۋگتەردە دە ۇيىمداستىرىلادى, – دەپ حابارلايدى qandastar.kz

باستامانىڭ باستى ماقساتى – وتاندىق كينونىڭ كوكجيەگىن كەڭەيتىپ, قازاقستاندىق كينوگەرلەردىڭ جەتىستىگىمەن تانىستىرۋ.

قازاق كينوسىنىڭ كۇندەرى اياسىندا كورەرمەندەر وزەكتى تاقىرىپتاردى قاۋزاپ, ەل تاريحى مەن مادەنيەتىن ايشىقتايتىن فيلمدەردى تاماشالاي الادى. وسىلايشا, شالعاي اۋىلدىڭ تۇرعىندارى بۇگىنگى قازاق كينەماتوگرافياسىنىڭ ۇزدىك تۋىندىلارىمەن قاۋىشپاق.

«كورسەتىلىمدى قاراعاندى وبلىسىنان باستاۋىمىزدىڭ وزىندىك سىرى بار. بۇل ايماق ءوندىرىستىڭ قايناعان ورتاسىندا ورنالاسقان. بيىلعى جىلدى پرەزيدەنتىمىز قاسىم-جومارت توقاەۆ «جۇمىسشى ماماندىقتار جىلى» دەپ جاريالاعانى بەلگىلى. سول سەبەپتى دە اۋقىمدى شارانى وسى ايماقتان باستاۋىمىزدىڭ سيمۆوليكالىق ءمانى بار. قاراعاندىدان باستاپ, ەلىمىزدىڭ ءار بۇرىشىندا قازاق كينوسىنىڭ كۇندەرىن وتكىزۋ وتاندىق كينەماتوگرافيانى ىلگەرىلەتۋگە سەرپىن سىيلايدى دەپ بىلەمىز. سەبەبى ءاربىر ءفيلمنىڭ ەڭ باستى جەڭىسى – ونىڭ ءوز كورەرمەنىن تابۋى. ءبىزدىڭ ماقساتىمىز دا ۇلتتىق كينونى حالىققا قولجەتىمدى ەتۋ», – دەدى ۇلتتىق كينونى قولداۋ ورتالىعىنىڭ باسقارما توراعاسى قۇرمانبەك جۇماعالي.

كينو كۇندەرى اياسىندا كورسەتىلەتىن «قاجىمۇقان» ۇلتتىق رۋحىمىزدى اسقاقتاتسا, «جامبىل. جاڭا ءداۋىر», «دوس-مۇقاسان» فيلمدەرى ارقىلى تۇلعالاردىڭ ءجۇرىپ وتكەن جولىنا قانىعۋعا مۇمكىندىك بەرىلەدى. «وپەراتسيا نابات», «ۆرەميا پاتريوتوۆ» قۇقىق قورعاۋشىلاردىڭ ەڭبەگىن پاش ەتىپ, وتانعا دەگەن سۇيىسپەنشىلىكتى ارتتىرادى. «باۋىرىنا سالۋ» دەپ اتالاتىن كينودا ۇلتتىق ءداستۇر دارىپتەلەدى. كىشكەنتاي كورەرمەندەرگە ارنالعان «تايقازان» دەپ اتالاتىن انيماتسيالىق فيلم, «الماتى, يا ليۋبليۋ تەبيا!», «سوڭعى ۇكىم», «دالا قاسقىرى», «ستوپ, نوچ» جانە «شۋلاما» فيلمدەرىنىڭ دە ايتار ويى بار. كينو ورتالىعىنىڭ قولداۋىمەن بيىل تاعى وننان اسا تۋىندى پروكاتقا شىعادى دەپ جوسپارلانۋدا.

ايتا كەتەيىك, بۇعان دەيىن كينو ورتالىعىنىڭ قولداۋىمەن 117 كارتينانىڭ ءوندىرىسى اياقتالعان. ونىڭ 72-ءسى – كوركەم, 37-ءسى – دەرەكتى, 8-ءى – انيماتسيالىق فيلمدەر. پروكاتقا شىققان تۋىندىلار دا ارتىپ جاتىر.