Qazaq kınosynyń kúnderi Qaraǵandydan bastaldy

Foto: Kıno ortalyǵy

Ulttyq kınony qoldaý ortalyǵy elimizdiń túkpir-túkpirinde Qazaq kınosynyń on kúndigin ótkizetinin habarlaıdy. Shara aıasynda kórermenderge QR Mádenıet jáne aqparat mınıstrliginiń, sondaı-aq Kıno ortalyǵynyń qoldaýymen túsirilgen birqatar fılm usynylady. Alǵashqy kórsetilim Qaraǵandy oblysyndaǵy «Saryjaılaý» kınoteatrynda ótkizildi, endigi kezekte shara ózge qalalar men aýyldyq okrýgterde de uıymdastyrylady, – dep habarlaıdy qandastar.kz

Bastamanyń basty maqsaty – otandyq kınonyń kókjıegin keńeıtip, qazaqstandyq kınogerlerdiń jetistigimen tanystyrý.

Qazaq kınosynyń kúnderi aıasynda kórermender ózekti taqyryptardy qaýzap, el tarıhy men mádenıetin aıshyqtaıtyn fılmderdi tamashalaı alady. Osylaısha, shalǵaı aýyldyń turǵyndary búgingi qazaq kınematografııasynyń úzdik týyndylarymen qaýyshpaq.

«Kórsetilimdi Qaraǵandy oblysynan bastaýymyzdyń ózindik syry bar. Bul aımaq óndiristiń qaınaǵan ortasynda ornalasqan. Bıylǵy jyldy Prezıdentimiz Qasym-Jomart Toqaev «Jumysshy mamandyqtar jyly» dep jarııalaǵany belgili. Sol sebepti de aýqymdy sharany osy aımaqtan bastaýymyzdyń sımvolıkalyq máni bar. Qaraǵandydan bastap, elimizdiń ár buryshynda qazaq kınosynyń kúnderin ótkizý otandyq kınematografııany ilgeriletýge serpin syılaıdy dep bilemiz. Sebebi árbir fılmniń eń basty jeńisi – onyń óz kórermenin tabýy. Bizdiń maqsatymyz da ulttyq kınony halyqqa qoljetimdi etý», – dedi Ulttyq kınony qoldaý ortalyǵynyń basqarma tóraǵasy Qurmanbek Jumaǵalı.

Kıno kúnderi aıasynda kórsetiletin «Qajymuqan» ulttyq rýhymyzdy asqaqtatsa, «Jambyl. Jańa dáýir», «Dos-Muqasan» fılmderi arqyly tulǵalardyń júrip ótken jolyna qanyǵýǵa múmkindik beriledi. «Operaııa Nabat», «Vremıa patrıotov» quqyq qorǵaýshylardyń eńbegin pash etip, Otanǵa degen súıispenshilikti arttyrady. «Baýyryna salý» dep atalatyn kınoda ulttyq dástúr dáripteledi. Kishkentaı kórermenderge arnalǵan «Taıqazan» dep atalatyn anımaııalyq fılm, «Almaty, ıa lıýblıý tebıa!», «Sońǵy úkim», «Dala qasqyry», «Stop, noch» jáne «Shýlama» fılmderiniń de aıtar oıy bar. Kıno ortalyǵynyń qoldaýymen bıyl taǵy onnan asa týyndy prokatqa shyǵady dep josparlanýda.

Aıta keteıik, buǵan deıin Kıno ortalyǵynyń qoldaýymen 117 kartınanyń óndirisi aıaqtalǵan. Onyń 72-si – kórkem, 37-si – derekti, 8-i – anımaııalyq fılmder. Prokatqa shyqqan týyndylar da artyp jatyr.