قازاق كوكپارى 2026 جىلى قىرعىزستاندا وتەتىن كوشپەندىلەر ويىندارىنان شەتتەتىلدى

فوتو: كوشپەندىلەر ويىندارىنىڭ ديرەكتسياسى

2026 جىلى وتەتىن كوشپەندىلەردىڭ دۇنيەجۇزىلىك ويىندارىنىڭ رەسمي باعدارلاماسىنا كوكپار ەنگىزىلگەن جوق, دەپ حابارلايدى qandastar.kz Orda.kz-كە سىلتەمە جاساپ.

قىرعىزستاننىڭ دەنە شىنىقتىرۋ جانە سپورت جونىندەگى مەملەكەتتىك اگەنتتىگىنىڭ توراعاسى ايبەك ابدىمومۋنوۆتىڭ ايتۋىنشا, بيىل تەك كوكبورى ويىنى وتەدى. سونىمەن قاتار جارىس فورماتىنا وزگەرىستەر ەنگىزىلگەن.

كوشپەندىلەر ويىندارى تاريحىندا تۇڭعىش رەت كلۋبتىق جۇيە ەنگىزىلەدى — ەندى ۇلتتىق قۇرامالار ەمەس, ءتۇرلى ەلدەردەن جينالعان ويىنشىلاردان قۇرالعان كلۋبتار ءوزارا باق سىنايدى.

«كلۋبتاردىڭ قۇرامىندا ءار ەلدەن ءبىر-ءبىر سپورتشى بولادى. جەرەبە ارقىلى قۇرىلعان بۇل ارالاس كوماندالاردا, مىسالى, ماناس نيازوۆ قازاقستان, وزبەكستان جانە ۆەنگريا ويىنشىلارىمەن بىرگە ءبىر كوماندادا ويناۋى مۇمكىن. وسىلايشا, ءبىز كوكبورىنى ساياسي استارسىز دامىتۋعا مۇمكىندىك بەرەمىز», – دەدى ابدىمومۋنوۆ.

كوكبورى — كوشپەندىلەر ويىندارىنىڭ كورەرمەندى كوپ جينايتىن نەگىزگى سپورت تۇرلەرىنىڭ ءبىرى. بۇل جارىستا قازاقستان مەن قىرعىزستان قۇرامالارى ۇنەمى باستى قارسىلاس رەتىندە كەزدەسىپ كەلگەن.

كوكپاردىڭ باعدارلاماعا ەنبەي قالۋى — بۇرىننان كەلە جاتقان كەلىسپەۋشىلىكتىڭ سالدارى.

• 2014 جىلعى العاشقى ويىندارعا قازاقستان كوكپار قۇراماسى قاتىسقان جوق.
• 2016 جىلى فينالدا قازاقستان قىرعىزستاننان 3:15 ەسەبىمەن جەڭىلدى.
• 2018 جىلى قازاقستان ۇيىمداستىرۋشىلاردىڭ تالاپتاردى ورىنداماعانىن العا تارتىپ, جارىسقا قاتىسۋدان باس تارتتى. ناقتىراق ايتقاندا, كوكپار قازاق ەرەجەسىمەن ەمەس, تايقازان ورنىنا شەڭبەر قولدانىلعان كوكبورى ەرەجەسىمەن ءوتتى.

ول كەزدە بۇل مالىمەتتى قازاقستان كوكپار فەدەراتسياسىنىڭ پرەزيدەنتى ەرلەن وسپانوۆ راستاعان. جەرگىلىكتى باسپاسوزگە بەرگەن ونىڭ سۇحباتى كوپشىلىك اراسىندا قىزۋ پىكىرتالاس تۋعىزدى.

ايتا كەتەيىك, 2013 جىلدان باستاپ قازاقستاندا كوكپاردى دامىتۋعا ەرەكشە ءمان بەرىلىپ, ازيا چەمپيوناتى (2013) جانە الەم چەمپيوناتى (2018) وتكىزىلگەن.

2022 جىلى تۇركيادا وتكەن كوشپەندىلەر ويىندارىندا باستاپقىدا باعدارلامادا تەك كوكپار بولعانىمەن, كەيىن قىرعىزستان تاراپى ارالاسىپ, كەلىسىمدەر نەگىزىندە باعدارلاماعا كوكبورى دە ەنگىزىلدى.

2024 جىلى قازاقستاندا وتكەن ويىنداردا كوكپار مەن كوكبورى قاتار وينالعان بولاتىن.