Qazaq kókpary 2026 jyly Qyrǵyzstanda ótetin Kóshpendiler oıyndarynan shettetildi

foto: Kóshpendiler oıyndarynyń dırekııasy

2026 jyly ótetin Kóshpendilerdiń dúnıejúzilik oıyndarynyń resmı baǵdarlamasyna kókpar engizilgen joq, dep habarlaıdy qandastar.kz Orda.kz-ke silteme jasap.

Qyrǵyzstannyń Dene shynyqtyrý jáne sport jónindegi memlekettik agenttiginiń tóraǵasy Aıbek Abdymomýnovtyń aıtýynsha, bıyl tek kókbóri oıyny ótedi. Sonymen qatar jarys formatyna ózgerister engizilgen.

Kóshpendiler oıyndary tarıhynda tuńǵysh ret klýbtyq júıe engiziledi — endi ulttyq quramalar emes, túrli elderden jınalǵan oıynshylardan quralǵan klýbtar ózara baq synaıdy.

«Klýbtardyń quramynda ár elden bir-bir sportshy bolady. Jerebe arqyly qurylǵan bul aralas komandalarda, mysaly, Manas Nııazov Qazaqstan, О́zbekstan jáne Vengrııa oıynshylarymen birge bir komandada oınaýy múmkin. Osylaısha, biz kókbórini saıası astarsyz damytýǵa múmkindik beremiz», – dedi Abdymomýnov.

Kókbóri — Kóshpendiler oıyndarynyń kórermendi kóp jınaıtyn negizgi sport túrleriniń biri. Bul jarysta Qazaqstan men Qyrǵyzstan quramalary únemi basty qarsylas retinde kezdesip kelgen.

Kókpardyń baǵdarlamaǵa enbeı qalýy — burynnan kele jatqan kelispeýshiliktiń saldary.

• 2014 jylǵy alǵashqy oıyndarǵa Qazaqstan kókpar quramasy qatysqan joq.
• 2016 jyly fınalda Qazaqstan Qyrǵyzstannan 3:15 esebimen jeńildi.
• 2018 jyly Qazaqstan uıymdastyrýshylardyń talaptardy oryndamaǵanyn alǵa tartyp, jarysqa qatysýdan bas tartty. Naqtyraq aıtqanda, kókpar qazaq erejesimen emes, taıqazan ornyna sheńber qoldanylǵan kókbóri erejesimen ótti.

Ol kezde bul málimetti Qazaqstan Kókpar federaııasynyń prezıdenti Erlen Ospanov rastaǵan. Jergilikti baspasózge bergen onyń suhbaty kópshilik arasynda qyzý pikirtalas týǵyzdy.

Aıta keteıik, 2013 jyldan bastap Qazaqstanda kókpardy damytýǵa erekshe mán berilip, Azııa chempıonaty (2013) jáne Álem chempıonaty (2018) ótkizilgen.

2022 jyly Túrkııada ótken Kóshpendiler oıyndarynda bastapqyda baǵdarlamada tek kókpar bolǵanymen, keıin Qyrǵyzstan tarapy aralasyp, kelisimder negizinde baǵdarlamaǵa kókbóri de engizildi.

2024 jyly Qazaqstanda ótken oıyndarda kókpar men kókbóri qatar oınalǵan bolatyn.