قازاق كومپوزيتورى شوتلانديانى باعىندىردى

قازاقستاندىق كومپوزيتور ءارى پيانيست راحات-بي ابدىساعىن بريتان جەرىندە قورىتىندى كونتسەرتىن وتكىزدى.

شوتلانديا كورولى روبەرت ءبريۋستىڭ 750 جىلدىعىنا وراي ۇيىمداستىرىلعان كەشكە كورولدىكتىڭ تۇكپىر-تۇكپىرىنەن كەلگەن قوناقتار قاتىستى. بۇل – «قازاقتىڭ موتسارتى» اتانعان راحات-بي ابدىساعىن. جاسى 20-عا جەتپەي, جەر ءجۇزىن مويىنداتقان كومپوزيتور. مۋزىكا سۇيەر قاۋىم ونىڭ ورەلى ونەرىن كورۋگە ىنتىزار. مۇنداي مۇمكىندىك بۇل جولى دانفەرملين جۇرتىنا بۇيىردى. مۋزىكانت كورەرمەنگە «بريۋس» وپەراسىن ۇسىندى. شىعارمادا شوتلانديا كورولى روبەرت بريۋس تۋرالى باياندالادى.

ال ليبرەتتو ورتاعاسىرلىق پوەماعا نەگىزدەلگەن. راحات-بي ابدىساعىن, كومپوزيتور-پيانيست: — بۇل پوەمانى 1375 جىلى دجون باربۋر جازىپ شىققان. شىعارما تاريحي تۇلعانىڭ بولمىسىن جان-جاقتى قىرىنان اشادى. جالپى بۇل تۋىندىنى وتكەن مەن بولاشاق اراسىنداعى مۋزىكالىق كوپىر دەۋگە بولادى.

سەبەبى وپەرادا بوستاندىق پەن ىزگىلىك تۋرالى سىر شەرتىلەدى. راحات-بي شىعارمانى جازۋ بارىسىندا بريتانيانىڭ جەتەكشى لينگۆيست, تاريحشىلارمەن قويان-قولتىق جۇمىس ىستەگەن. بەدەلدى ادەبيەتتانۋشىلارمەن كەڭەسكەن. ال قويىلىمدى قويۋعا شوتلانديانىڭ كورولدىك كونسەرۆاتورياسىنىڭ وپەرا انشىلەرى مەن ديريجيورلەرى اتسالىستى. مارك دەنيس, تەاتردىڭ كوستيۋم جونىندەگى سۋرەتشىسى: — ءبىز قازىر دانفەرملين ابباتتىعىنداعى شىركەۋدە تۇرمىز. ءدال وسى جەردە كورول روبەرت بريۋس جەرلەنگەن.

بۇگىن ساحنادان كورگەن كيىمدەردىڭ ءبارى – شوتلاند پاتشاسى زامانىنداعى ۇلگىلەردىڭ ءدال كوشىرمەسى. وسىنداي جوباعا قاتىسۋ مۇمكىندىگى بۇيىرعانىنا وتە قۋانىشتىمىن. مۋزىكانت بۇگىنگە دەيىن سيمفونيالىق وركەسترگە جانە ءار جانرداعى كامەرالىق انسامبلدەرگە ارنالعان 100-دەن اسا كلاسسيكالىق مۋزىكالىق تۋىندىنىڭ اۆتورى اتانىپ ۇلگەردى. راحات-ءبيدىڭ قيالىنان تۋعان عالامات مۋزىكا الەمنىڭ ءىرى قالالارىنىڭ ۇزدىك ساحنالارىندا ورىندالىپ, كلاسسيكالىق مۋزىكانىڭ تالعامپاز تىڭدارماندارى اراسىندا زور قوشەمەتكە بولەنىپ ءجۇر.