جاڭالىقتار
قازاق قىزى «ءازىربايجان داۋىسى – 2025» بايقاۋىنىڭ فينالىنا ءوتتى
2025 جىلدىڭ 18 مامىرىندا اتىراۋ قالاسىنان شىققان 20 جاستاعى سانات اسۋات «ءازىربايجان داۋىسى – 2025» حالىقارالىق مۋزىكالىق شوۋىنىڭ جارتىلاي فينالىندا تاماشا ونەر كورسەتىپ, بايقاۋدىڭ فينالىنا جولداما الدى. جوبا باستالعالى بەرى كورەرمەندەردىڭ ىستىق ىقىلاسىنا بولەنىپ كەلە جاتقان ساناتتى قازاقستان حالقى زور ۇمىتپەن قولداپ وتىر. بۇل – ونىڭ ونەرىنە ارنالعان بەينەروليكتەردىڭ استىنداعى جۇزدەگەن پىكىردەن-اق بايقالادى, دەپ جازادى Qandastar.kz سايتى Skifnews.kz اقپارات پورتالىنا سىلتەمە جاساپ.
اتالعان بايقاۋ بيىل اقپان ايىندا باستالىپ, ءتورتىنشى ماۋسىمدا باستى ساحناعا شىعۋ ءۇشىن ءازىربايجان, قازاقستان, گرۋزيا, تۇركيا, رەسەي جانە ۋكراينا ەلدەرىنەن كەلگەن تالانتتى ۆوكاليستەر باق سىناۋدا.
سانات – قازاقستاننان قاتىسىپ جاتقان جالعىز ونەرپاز. ول «كورمەي تىڭداۋ» كەزەڭىنەن باستاپ-اق قازىلار مەن كورەرمەندەردىڭ ەرەكشە نازارىن اۋدارعان. ۇلكەن ساحناداعى تاجىريبەسى از بولسا دا, ءارتۇرلى مۋزىكالىق ستيلدەر مەن رەپەرتۋارلاردى ءساتتى يگەرىپ, ءوزىنىڭ كاسىبي دەڭگەيىن كورسەتىپ كەلەدى. جارتىلاي فينالدا سانات ساميرا ەفەنديدىڭ رەپەرتۋارىنان الىنعان Mata Hari انىن ورىندادى. ايتا كەتەيىك, ساميرا ەفەندي – «ەۆروۆيدەنيە-2021» بايقاۋىندا حالىقارالىق تانىمالدىققا يە بولعان ازىربايجاندىق ءانشى.
شوۋدىڭ فينالدىق كەزەڭى 25 مامىردا وتەدى. سانات دايىندىقتى جالعاستىرىپ جاتىر, دەگەنمەن جارتىلاي فينال الدىنداعى كەزەڭ وڭاي بولماعان. ول قازىرگى تاڭدا ت.جۇرگەنوۆ اتىنداعى قازاق ۇلتتىق ونەر اكادەمياسىنىڭ ستۋدەنتى. بايقاۋعا قاتىسۋىمەن قاتار, سەسسيا تاپسىرۋى دا ونىڭ ۋاقىتىنا ۇلكەن سالماق تۇسىرگەن. رەپەتيتسيالار, ماتەريالمەن جۇمىس جانە ساحنالىق وبراز دايىنداۋ – بارلىعى قىسقا مەرزىمدە قاتار اتقارىلعان.
ايتا كەتكەن ءجون, جەڭىمپازدى انىقتاۋ تەك ازىربايجاندىق بايلانىس وپەراتورلارىنىڭ sim-كارتالارى ارقىلى بەرىلگەن داۋىستارعا بايلانىستى جۇزەگە اسادى. سوندىقتان قازاقستاننان داۋىس بەرۋ مۇمكىن ەمەس.
دەگەنمەن, سانات سوڭعى بەس كۇن ىشىندە حالىقارالىق The Voice رەيتينگتەرىندە «اپتانىڭ ۇزدىك ونەر كورسەتۋلەرى» قاتارىنا ەندى. ونىڭ التى قويىلىمىنىڭ تورتەۋى مۋزىكالىق فرانشيزا پروديۋسەرلەرىنەن جوعارى باعا الدى. قازاقستان مەن وزگە ەلدەردەگى جانكۇيەرلەر ساناتتىڭ جەڭىسىنە زور ءۇمىت ارتىپ وتىر.
