«قازاق ءتىلىنىڭ بولاشاعى بالاباقشادا جاتىر»: بەلگىلى اكتەر ماڭىزدى ماسەلە كوتەردى

بەلگىلى تەاتر جانە كينو اكتەرى, قازاقستاننىڭ ەڭبەك سىڭىرگەن قايراتكەرى دۋلىعا اقمولدا ۇلتتىق يدەولوگياعا قاتىستى پىكىر ءبىلدىرىپ, بالاباقشاداعى تاربيە, ءتىل ماسەلەلەرىن سىنعا الدى, دەپ حابارلايدى qandastar.kz Skifnews.kz اقپارات پورتالىنا سىلتەمە جاساپ.

“كوكتەمدە, جازدا تاڭ اتپاستان بالالاردى ورىس تىلىندە جاتتىعۋ جاساتىپ جاتقان داۋىستارى ەستىلىپ جاتادى. تاربيەشىلەرىنىڭ ءبارى ورىسشا سويلەيدى. “راز, دۆا, نوگي. راز, دۆا, رۋكي”. گدە رۋكي? داۆايتە, ۆەسەلىە رۋكي!” دەپ ايقايلاپ جاتادى. بارساڭ, ءبارى قازاقتىڭ كىپ-كىشكەنتاي بالالارى”, – دەيدى اكتەر.

اكتەر سونداي-اق وسىنداي ماسەلەلەردى قولعا الىپ, كەزىندە ءتىل جاناشىرلارى جاپ-جاقسى باستامالارىمەن شىققانىن, الايدا ۇكىمەت تاراپىنان قولداۋ بولماعاندىقتان, اياقسىز قالعانىنا دا الاڭداۋشىلىق ءبىلدىردى.

“كوردىڭىز بە, ۇلتتىق يدەولوگيا دەپ وتىرعانىم وسى. وسىلاردىڭ ءبارى قاداعالانۋى كەرەك. بۇعان زاڭ ورگاندارى كىرىسۋى كەرەك شىعار. قازىر كىمنىڭ نەمەن اينالىسىپ جۇرگەنىن بىلمەيتىن بولدىق قوي. كوشەدە بىرەۋ تاياق جەپ جاتسا كىمگە حابارلاسىپ, كىمدى شاقىراتىنىمىزدى دا بىلمەي قالدىق. سونداي زامان بولدى. بۇدان دا وتەرمىز ەندى. تەزىرەك وتسەك ەكەن. ارينە, قازىر دە بار كۇرەسىپ جۇرگەندەر. بىراق ولار دا ءبىر كۇنى تاياق جەيدى. قاشانعى ەلمەن الىسا بەرەدى دەيسىز. سوندىقتان ءتىل ماسەلەسىن تۇزەۋدى بالاباقشادان باستاۋىمىز كەرەك. ءتىلدى ۇيرەتىپ قانا قويماي, سول ءتىلدىڭ تۇپكى نەگىزى قايدا جاتىر, ونىڭ مادەنيەتى مەن ادەبيەتى قايدان باستالادى, سونى ءبىلىپ ءوسۋى كەرەك”, – دەيدى دۋلىعا اقمولدا.