«Qazaq tiliniń bolashaǵy balabaqshada jatyr»: Belgili akter mańyzdy másele kóterdi

Belgili teatr jáne kıno akteri, Qazaqstannyń eńbek sińirgen qaıratkeri Dýlyǵa Aqmolda ulttyq ıdeologııaǵa qatysty pikir bildirip, balabaqshadaǵy tárbıe, til máselelerin synǵa aldy, dep habarlaıdy qandastar.kz Skifnews.kz aqparat portalyna silteme jasap.

“Kóktemde, jazda tań atpastan balalardy orys tilinde jattyǵý jasatyp jatqan daýystary estilip jatady. Tárbıeshileriniń bári oryssha sóıleıdi. “Raz, dva, nogı. Raz, dva, rýkı”. Gde rýkı? Davaıte, veselye rýkı!” dep aıqaılap jatady. Barsań, bári qazaqtyń kip-kishkentaı balalary”, – deıdi akter.

Akter sondaı-aq osyndaı máselelerdi qolǵa alyp, kezinde til janashyrlary jap-jaqsy bastamalarymen shyqqanyn, alaıda Úkimet tarapynan qoldaý bolmaǵandyqtan, aıaqsyz qalǵanyna da alańdaýshylyq bildirdi.

“Kórdińiz be, ulttyq ıdeologııa dep otyrǵanym osy. Osylardyń bári qadaǵalanýy kerek. Buǵan zań organdary kirisýi kerek shyǵar. Qazir kimniń nemen aınalysyp júrgenin bilmeıtin boldyq qoı. Kóshede bireý taıaq jep jatsa kimge habarlasyp, kimdi shaqyratynymyzdy da bilmeı qaldyq. Sondaı zaman boldy. Budan da ótermiz endi. Tezirek ótsek eken. Árıne, qazir de bar kúresip júrgender. Biraq olar da bir kúni taıaq jeıdi. Qashanǵy elmen alysa beredi deısiz. Sondyqtan til máselesin túzeýdi balabaqshadan bastaýymyz kerek. Tildi úıretip qana qoımaı, sol tildiń túpki negizi qaıda jatyr, onyń mádenıeti men ádebıeti qaıdan bastalady, sony bilip ósýi kerek”, – deıdi Dýlyǵa Aqmolda.