جاڭالىقتار
KAZAKHEXPORT وتاندىق وندىرۋشىلەردى قولدايدى
«KazakhExport» ەكسپورتتىق ساقتاندىرۋ كومپانياسى» سوڭعى ءبىر جىلدا وتاندىق ەكسپورتتاۋشىلارعا 324 ميلليارد تەڭگە كولەمىندە قولداۋ كورسەتكەن. «بۇل رەكوردتىق كورسەتكىش»,- دەيدى ماماندار. تارازداعى كونديتەرلىك ونىمدەردى وندىرەتىن «ساۋلە» فابريكاسى 2017 جىلى جۇمىسىن باستادى. كاسىپورىن 150 تۇرعىندى تۇراقتى جۇمىسپەن قامتىپ وتىر. جىلىنا 4500 توننا ءتاتتى ءوندىرىپ, 70-تەن اسا تاۋار ءتۇرىن شىعارادى. تاۋارلارىن ەلىمىزدىڭ بارلىق ايماعى مەن قىتاي, گرۋزيا سىندى الەمنىڭ 6 ەلىنە ەكسپورتتايدى. شەت ەلمەن ساۋدا ساتتىققا «KazakhExport» ۇلتتىق كومپانياسى قولداۋ كورسەتۋدە. دياس شاۋحاروۆ, «ساۋلە» كونديتەرلىك فابريكاسىنىڭ كوممەرتسيالىق ديرەكتورى: — ساتىپ الۋشى كومپانيا بىزگە اقشاسىن تولەمەي كەتسە, ونى ءبىز 80 پايىزىن «KazakhExport»-تان الا الامىز. تاۋاردى قارىزعا جىبەرۋ دەگەن ۇلكەن ريسك دەيدى عوي. سوندىقتان سول ريسك بويىنشا بىزگە «KazakhExport» كومپانياسى سەكىلدى جاردەم بەرەتىن قىزمەتتەرى وتە ءتيىمدى. بىلتىر وتاندىق ءونىم شىعاراتىن 89 كومپانيا KazakhExport-تىڭ قولداۋىنا يە بولدى. ولاردىڭ 60 پروتسەنتكە جۋىعى شاعىن جانە ورتا بيزنەس وكىلدەرى. بۇل كاسىپورىندار تاماق جانە حيميا ونەركاسىبى, ماشينا جاساۋ, اگروونەركاسىپتىك كەشەن, مەتاللۋرگيا جانە باسقا دا سالادا جۇمىس ىستەيدى. داۋرەن نۇرانوۆ, «KazakhExport» ەسك» اق ساقتاندىرۋ دەپارتامەنتىنىڭ ديرەكتورى: — 2023 جىلى KazakhExport 10 جىلعا مەملەكەتتەن 129 ميلليارد تەڭگە كولەمىندە كەپىلدىك الدى. بۇل وتاندىق وندىرۋشىلەردى قولداپ, ەكسپورت كولەمىن ارتتىرۋعا مول مۇمكىندىك بەرىپ وتىر. قازىرگى تاڭدا كومپانيامىز 650 ميلليارد تەڭگەنىڭ تاۋارىن ساقتاندىرا الادى. «بايتەرەك» ۇلتتىق باسقارۋشى حولدينگىنە قاراستى «KazakhExport» ۇلتتىق كومپانياسى بۇگىندە الەمنىڭ كوپتەگەن ەلىمەن بايلانىس ورناتقان. سونىڭ ەسەبىنەن وتاندىق تاۋار وندىرۋشىلەر شەتەلدىك نارىققا قيىندىقسىز شىعا الادى. ايتا كەتەرلىگى 2016 جىلدان باستاپ بۇگىنگە دەيىن ۇلتتىق كومپانيا ەكسپورتتاۋشىلارعا 1,1 تريلليون تەڭگە كولەمىندە قولداۋ كورسەتتى.
