جاڭالىقتار
«قازاقمىس» ۇلىتاۋداعى شاحتا اپاتىنىڭ الدىن الا سەبەبىن جاريالادى
فوتو: اشىق دەرەككوز
ۇلىتاۋ وبلىسىندا «جومارت» شاحتاسىنداعى اپاتتا ءۇيىندى استىندا قالعان جەتىنشى جۇمىسشىنى ىزدەستىرۋ جۇمىستارى جالعاسۋدا. «قازاقمىس» كورپوراتسياسى اپاتتىڭ الدىن الا سەبەبىن ايتىپ, قازا تاپقانداردىڭ وتباسىلارىنا قانداي كومەك بەرىلەتىنى جونىندە مالىمدەمە جاسادى, — دەپ حابارلايدى qandastar.kz
كورپوراتسيا ۇسىنعان الدىن الا مالىمەتكە سايكەس, «قازاقمىس» كورپوراتسياسىنىڭ كەنىشتەرى ءۇشىن ءتان ەمەس تابيعي گازدىڭ جارىلىسى بولعان.
— وقيعانىڭ ءمان-جايى مەن سەبەپتەرى انىقتالۋدا. قايعىلى جاعدايدى تەرگەۋ ءۇشىن ارنايى مەملەكەتتىك كوميسسيا قۇرىلدى. تراگەديانىڭ بارلىق ءمان-جايىن انىقتاۋدا تولىق كومەك كورسەتۋدە. «قازاقمىس» باسشىلىعى مەن ۇجىمى قازا تاپقانداردىڭ وتباسىلارى مەن جاقىندارىنا قايعىرىپ كوڭىل ايتادى, — دەلىنگەن حابارلامادا.
«قازاقمىس» ۇجىمدىق كەلىسىمشارتتا كوزدەلگەندەي, «جومارت» كەنىشىندە قازا تاپقانداردىڭ وتباسىلارىنا بارلىق قاجەتتى كومەك كورسەتىلەتىنىن مالىمدەدى.
— الەۋمەتتىك جانە ماتەريالدىق قولداۋ ماقساتىندا, سونىڭ ىشىندە مورالدىق زياندى وتەۋ ءۇشىن قازا تاپقانداردىڭ وتباسىلارىنا جۇمىسكەردىڭ ورتاشا جىلدىق جالاقىسىنىڭ 10 ەسەلەنگەن مولشەرى جانە 2 ميلليون تەڭگەدەن استام جەرلەۋ راسىمدەرىن ۇيىمداستىرۋعا تولەنەدى.
سونداي-اق اسىراۋشىسىنان ايىرىلۋ جاعدايىنا اي سايىنعى تولەمدەر, بالالاردىڭ وقۋ اقىسىن تولەۋ, قازا تاپقان جۇمىسشىلاردىڭ نەسيە جانە قارىزدارىن جابۋ, سونداي-اق وتباسى مۇشەلەرىنىڭ ءوتىنىشى بويىنشا باسقا دا كومەك تۇرلەرى قاراستىرىلعان, — دەلىنگەن كورپوراتسيانىڭ رەسمي مالىمدەمەسىندە.
