«قازاقمىستان» مەتالل جانە تاۋار ۇرلاۋمەن اينالىسقان 20 ادام ۇستالدى

فوتو: polisia.kz 

ىشكى ىستەر مينيسترلىگى ۇلتتىق قاۋىپسىزدىك كوميتەتىمەن بىرلەسىپ, قاراعاندى وبلىسى پروكۋراتۋراسىنىڭ ۇيلەستىرۋىمەن ونەركاسىپتىك كومپانيالاردان, ونىڭ ىشىندە «قازاقمىستان» مەتالل جانە تاۋار ۇرلاۋمەن اينالىسقان قىلمىستىق توپتى قۇرىقتادى, دەپ حابارلادى turkystan.kz.

جەرگىلىكتى كريميناليتەتتەن باسقا قىلمىستىق ارەكەتكە كاسىپورىن قىزمەتكەرلەرى, ونىڭ ىشىندە قاۋىپسىزدىك قىزمەتىنىڭ باسشىلارى مەن قىزمەتكەرلەرىنىڭ قاتىسى بار دەپ كۇدىكتەلۋدە. قىلمىستىق ءىس-ارەكەت سالدارىنان كەلتىرىلگەن زالال انىقتالىپ جاتىر.

– قاراعاندى وبلىسىنىڭ پوليتسيا دەپارتامەنتىنە 20-دان استام كۇدىكتى جەتكىزىلدى. ءتىنتۋ ءىس-شارالارى بارىسىندا ولاردان اتىس جانە تراۆماتيكالىق قارۋ, اۆتوكولىك, قاراجات جانە قىلمىستىق ءىس بويىنشا باسقا دا زاتتاي دالەلدەمەلەر تاركىلەندى. تەرگەۋ مۇددەسى ءۇشىن وزگە مالىمەتتەر جاريا ەتىلمەيدى, – دەدى ءىىم ۇيىمداسقان قىلمىسقا قارسى كۇرەس دەپارتامەنتىنىڭ وكىلى قۋاندىق الپىس.

ءىىم قالا قۇراۋشى كاسىپورىنداردا ارەكەت ەتەتىن قىلمىستىق توپتاردى انىقتاۋ جانە جولىن كەسۋ جۇمىستارىن جۇيەلى تۇردە جۇرگىزەدى.