جاڭالىقتار
قازاقستان اۋرۋحانالارىندا مەديتسينا قىزمەتكەرلەرىن ساقتاندىرۋعا اقشا جوق: ەندى ولار زاڭسىز جۇمىس ىستەيدى
فوتو: pixabay.com
قازاقستانداعى ءاربىر ءىرى اۋرۋحانا دارىگەرلەرى مەن مەدبيكەلەرىن ساقتاندىرۋعا 20-25 ميلليون تەڭگە جۇمساۋى قاجەت. الايدا مۇنداي اقشا ولاردا جوق. بۇل تۋرالى qandastar.kz اقپارات اگەنتتىگى «ۆرەميا» گازەتىنە سىلتەمە جاساپ حابارلايدى.
دارىگەرلەردى ساقتاندىراتىن مedpul.kz پلاتفورماسى 18 قازاندا اشىلدى. ال مەديتسينالىق قىزمەتكەرلەردى ساقتاندىرۋ تۋرالى زاڭ 23 قازاننان باستاپ كۇشىنە ەندى. قازاقستانداعى 8 مىڭعا جۋىق بارلىق دەنساۋلىق ساقتاۋ وبەكتىلەرى ساقتاندىرۋعا مىندەتتى.
الايدا ساراپشىلاردىڭ ايتۋىنشا ساقتاندىرۋ سوماسىن قالتا كوتەرمەيدى.
«ماسەلەن الماتىداعى بىر مەملەكەتتىك كوپسالالى كلينيكالىق اۋرۋحانانىڭ مەديتسينالىق پەرسونالى 600-800 ادامعا تەڭ. ونىڭ ىشىندە 200-گە جۋىعى حيرۋرگ. ءار دارىگەردىڭ ساقتاندىرۋى شامامەن 88 000 تەڭگە بولادى. سوندا جالپى العاندا بۇل 18 ميلليون تەڭگەگە جۋىق. سونىمەن قاتار ورتاشا مەديتسينا قىزمەتكەرلەرى بار. اۋرۋحاناعا شامامەن 20-25 ميلليون تەڭگە شوت قويىلادى», – دەدى الماتى كلينيكالارى قاۋىمداستىعىنىڭ اتقارۋشى ديرەكتورى, زاڭگەر, دارىگەر راسۋل دۇيسەنوۆ.
اقمولا وبلىسىنىڭ دەنساۋلىق ساقتاۋ جۇيەسى قىزمەتكەرلەرىنىڭ «SENIM» جەرگىلىكتى كاسىپوداعىنىڭ توراعاسى سەرىك كاكەنوۆ اۋرۋحانالاردىڭ باس دارىگەرلەرى ساقتاندىرۋعا قوسىمشا اقشا بولۋگە ۇمىتتەنەتىنىن ايتتى.
«قازىر مەديتسينالىق ساقتاندىرۋ قورى كلينيكالارعا شىلدە-تامىز ايلارىندا كورسەتىلگەن قىزمەتتەر ءۇشىن اقشا اۋدارىپ جاتىر. ول ەڭ الدىمەن جالاقى مەن شۇعىل تولەمدەرگە جۇمسالادى. ءبىزدىڭ ايماقتاعى مەملەكەتتىك اۋرۋحانالاردىڭ كوپشىلىگىندە كرەديتورلىق بەرەشەك بار. ياعني سالىقتى, جەتكىزۋشىلەر قىزمەتى مەن كاسىپوداق جارنالارىن ۋاقىتىندا تولەۋگە مۇمكىندىگى جوق. ال قىزمەتكەرلەردى ساقتاندىرۋ ءۇشىن بىرنەشە ميلليون تەڭگەنى قايدان الادى?
جاقىندا دەنساۋلىق ساقتاۋ مينيسترلىگىنىڭ مەديتسينالىق قىزمەت كورسەتۋ تاريفتەرىن كوتەرۋ تۋرالى بۇيرىعى شىقتى. ايتۋلارىنشا, سول ارقىلى اۋرۋحانالار ساقتاندىرۋ شىعىنىن جابۋى كەرەك. بىراق تاريف قۇنى شامالى عانا وسكەندىكتەن بار شىعىندى وتەۋى ەكىتالاي. سوندىقتان باس دارىگەرلەر دەنساۋلىق ساقتاۋ مينيسترلىگىنەن جاۋاپ كۇتىپ وتىر. مۇنداي جاعدايدا قالاي ارەكەت ەتۋ كەرەك جانە ساقتاندىرۋعا قوسىمشا قاراجاتقا سەنە الا ما?», – دەيدى كاكەنوۆ.
ساراپشىلار ساقتاندىرۋ شارتىنسىز باقىلاۋشى ورگاندار كلينيكالارعا ايىپپۇل سالا الاتىنىن جەتكىزدى. نەمەسە ولارعا مەديتسينالىق قىزمەتتى جۇزەگە اسىرۋعا تىيىم سالا الادى. ءتىپتى اكىمشىلىك جاۋاپكەرشىلىك قاراستىرىلعان.
