قازاقستان ازاماتتىعىن الۋ ءۇشىن 100 سۇراقتان تۇراتىن تەست تاپسىرۋ كەرەك

فوتو: اشىق دەرەككوز

تەست قازاق تىلىنەن بولەك, قازاقستان كونستيتۋتسياسى مەن تاريحى بويىنشا سۇراقتاردى قامتيدى, دەپ حابارلايدى Skifnews.kz اقپارات پورتالى.

عىلىم جانە جوعارى ءبىلىم مينيسترلىگى قازاقستان ازاماتتىعىن الۋ ءۇشىن قازاق ءتىلى جانە قازاقستان تاريحى مەن كونستيتۋتسياسى بويىنشا ەمتيحان تاپسىرۋدىڭ ەرەجەلەرىن ازىرلەدى.

قۇجات جوباسى اشىق نقا پورتالىندا جاريالاندى.

ەمتيحان تەست فورماتىندا وتەدى. تەست 100 سۇراقتان تۇرادى. ونىڭ ىشىندە:

قازاق ءتىلى بويىنشا – 60, ونىڭ ىشىندە: تىڭدالىم بولىگى بويىنشا – 20, وقىلىم بولىگى بويىنشا – 40 سۇراق;

قر كونستيتۋتسياسىنىڭ نەگىزدەرى بويىنشا – 15 سۇراق;

قازاقستان تاريحى بويىنشا – 25 سۇراق.

قازاقستان ازاماتتىعىن الۋ ءۇشىن جەتكىلىكتى شەكتى بالل 60 بالل بولىپ بەلگىلەندى. ونىڭ ىشىندە ۇمىتكەر:

قازاق ءتىلىنىڭ تىڭدالىم بولىگى بويىنشا – كەمىندە 12 بالل, وقىلىم بولىگى بويىنشا – كەمىندە 24 بالل;

قر كونستيتۋتسياسىنىڭ نەگىزدەرى بويىنشا كەمىندە – 9 بالل;

قازاقستان تاريحى بويىنشا – كەمىندە 15 بالل جيناۋى كەرەك.

تەستىلەۋگە بەرىلەتىن  جالپى ۋاقىت 2 ساعات 10 مينۋتتى قۇرايدى.

مۇمكىندىگى شەكتەۋلى تۇلعالارعا (مۇگەدەكتىگى بار) تەستىلەۋ ءۇشىن قوسىمشا 30 مينۋت بەرىلەدى. تەست تاپسىرۋدان كەلەسىلەر بوساتىلادى:

كامەلەتكە تولماعاندار;

ارەكەتكە قابىلەتسىز ادامدار;

قازاقستان رەسپۋبليكاسىنا سىڭىرگەن ايرىقشا ەڭبەگى بار نە قازاقستان رەسپۋبليكاسىنىڭ پرەزيدەنتى بەلگىلەيتىن تىزبە بويىنشا كاسىپتەرگە يە جانە تالاپتارعا ساي كەلەتىن ادامدار;

ەتنوستىق قازاقتار;

قازاقستان رەسپۋبليكاسى راتيفيكاتسيالاعان حالىقارالىق شارتتار نەگىزىندە جەڭىلدەتىلگەن تارتىپپەن قازاقستان رەسپۋبليكاسىنىڭ ازاماتتىعىن الۋعا قۇقىعى بار ادامدار.

تەستىلەۋگە قاتىسۋ ءۇشىن وتىنىشتەردى قابىلداۋ كەلەسى مەرزىمدەردە جۇزەگە اسىرىلادى:

10-20 قاڭتار ارالىعى;

10-20 ءساۋىر ارالىعى;

10-20 شىلدە ارالىعى;

10-20 قازان ارالىعى.