قازاقستان بيىل ءوز زىمىرانىن عارىشقا ۇشىرماق

فوتو: ەگەمەن قازاقستان

قازاقستان بيىل ءوز زىمىرانىن عارىشقا ۇشىرماق. قازىر ول ءۇشىن قارجى ءبولىنىپ, ايلاق دايىندالىپ جاتىر. ال الداعى 5-10 جىلدا ءتورتىنشى قازاق عارىشقا ساپار شەگۋى مۇمكىن, دەپ حابارلايدى qandastar.kz اقپارات پورتالى.

بايقوڭىردان 73-ۇزاق مەرزىمدى ەكسپەديتسيا عارىشقا اتتاندى. زىمىران تاسىعىش اۋەگە كوتەرىلگەننەن كەيىن 9 مينۋت وتكەن سوڭ وربيتاعا شىقتى. ەكيپاج مۇشەلەرى حالىقارالىق عارىش ستانساسىندا 50-گە جۋىق عىلىمي تاجىريبە جۇرگىزىپ, 9 جەلتوقساندا جەرگە ورالماق.

بيىل — بايقوڭىر عارىش ايلاعىنىڭ رەسمي تۇردە قۇرىلعانىنا 70 جىل. 78 جاستاعى نۇرتىلەۋ سالىقوۆ بالا كۇنىنەن مۇنداعى تىرشىلىككە قانىق. كەيىننەن ءوزى سوندا جۇمىسقا ورنالاسىپ, كوپتەگەن ۇشىرىلىمعا كۋا بولعان. ايتۋىنشا, بۇل جەردىڭ عارىش ايلاعى رەتىندە تاڭدالۋى تەگىن ەمەس.

«اتامىز قازاق بۇدان بىرنەشە عاسىر بۇرىن بۇنى «جەر كىندىك» دەپ اتاعان. سول قازىرگى جەر كىندىك گاگارينسكي ستارت, ۇشۋ الاڭىنا اينالىپ وتىر», — دەيدى ول.

بيىل ۇلتتىق عارىش ورتالىعىندا زىمىران تاسىعىش جاساۋ جۇمىسى باستالادى. بۇل ەلدىڭ استروناۆتيكادا ءوزىن شىنداپ تانىتۋىنا مۇمكىندىك بەرەدى, دەيدى ماماندار. وتاندىق ستانتسيادان العاشقى ۇشىرىلىم بيىلعا جوسپارلانعان.

«بىزدە «عارىشقا تاۋەلسىز قول جەتكىزۋ» دەگەن باستاما بار. ءبىزدىڭ عىلىمي جۇمىسىمىز 2021 جىلدان بەرى جۇرگىزىلىپ كەلەدى. بۇل تەحنولوگيانى يگەرۋگە مىقتى حيميكتەر مەن فيزيكتەردى جينادىق. بيىل شاعىن مەتەوريتتىك زىمىران جاساپ, وسى تەحنولوگيانى مەڭگەرۋدى جوسپارلاپ وتىرمىز», — دەيدى قازاقستان اەروعارىش كوميتەتىنىڭ توراعاسى باۋبەك ورالماعامبەتوۆ.

بايقوڭىر عارىش ايلاعى الەمگە عىلىمي-تەحنيكالىق پروگرەسكە, ال ادامزاتقا عارىشقا جول اشتى. عارىش ءداۋىرى باستاۋ العان الاڭنان بيىل 10-عا جۋىق زىمىران ۇشىرۋ جوسپارلانعان. سوعان ساي جۇلدىزدى قالاشىققا 20 مىڭعا جۋىق تۋريست كەلەدى دەپ بولجانىپ وتىر.