Qazaqstan ekinshi olımpıada qatarynan bokstan altynsyz qaldy

Foto: ashyq derekkóz

Qazaqstan ekinshi olımpıada qatarynan bokstan altynsyz qaldy, – dep habarlaıdy  qandastar.kz  Dalanews.kz-ke silteme jasap.

Kúni keshe boksshy Nurbek Oralbaı Parıj Olımpıadasynyń kúmis júldegeri atandy. Oralbaı fınalda ýkraınalyq Aleksandr Hıjnıaktan jeńilip qaldy.

80 kelige deıingi salmaqta ótken sheshýshi shaıqasta Nurbek baryn saldy. Ol qorǵanyp júrip, ýkraınalyqtyń qapysyn tabýǵa umtyldy. Raýnd saıyn tóreshilerdiń esebi bóle jarylyp otyrdy. Jekpe-jek qorytyndysynda Hıjnıak jeńiske jetti.

Nurbek Oralbaı Qazaqstan erler quramasy sapynda júldege ilikken jalǵyz boksshy. Ol ózi qatysqan alǵashqy Olımpıadada kúmis júldeger atandy.

Bul salmaqta Aleksandr chempıon, Nurbek kúmis aldy. Qolany Krıstıan Haver Pınales (Domınıkan Respýblıkasy) pen Arlen Lopes Kardona (Kýba) ıelendi.

Sonymen qatar, bokstan Qazaqstan komandasynyń múshesi Nazym Qyzaıbaı Parıj Olımpıadasynda el qorjynyna qola medal saldy. 50 keli salmaqta synǵa túsken Qyzaıbaı jartylaı fınalda bokstan álem jáne Azııa oıyndarynyń chempıony, qytaılyq Vý Iýge ese jiberdi.

Osylaısha Qazaqstan 2024 jylǵy jazǵy olımpıada oıyndaryna bokstan eki medal: kúmis jáne qolamen qaıtty.

Aıta keteıik, 2020 jyly Tokıoda ótken jazǵy Olımpıada da qazaq boksy úshin sátsiz boldy. Sol jyly Qazaqstan bokstan eki qola medal (Sáken Bıbosynov pen Qamshybek Qońqabaev) aldy.

Al 2016 jyly Rıoda ótken Olımpıada oıyndarynda boksshy Danııar Eleýsinov Qazaqstannyń qorjynyna altyn medal salǵan bolatyn.

Buǵan deıin belgili saıasatker, memleket qaıratkeri, QR Eńbek sińirgen jattyqtyrýshysy Amalbek Tshan Qazaqstandaǵy bokstyń  jaı-kúıine baılanysty pikir bildirdi. Keńes Odaǵy kezinde bokstan gúrzi judyryǵymen qarsylastaryn talaı márte sulatyp túsirgen ardager sportshy eldegi sport ahýalyn synap tastady. 

Onyń sózinshe, qazirgi tańda  eldegi sport salasy aıtarlyqtaı aqsap tur. Munyń basty sebebi retinde ol basshylyqty tájirıbesi joq biliksiz mamandardyń jaıpap alýymen baılanystyrdy.

“Parıj Olımpıadasyna baılanysty kóptegen pikir aıtylýda. Osy salanyń aınalasynda júrgendikten, maǵan Qazaqstandaǵy, sonyń ishinde qazaqtyń ulttyq sportyna aınalǵan bokstyń ahýalyna baılanysty suraqtar jıi keledi. Shyndyǵyna kelgende, keıingi kezde sportty basqaratyn mınıstrlikte,  kabınettiń tóraǵalyǵynda ártúrli jaǵdaımen sporttan esh habary joq, jalpy sportty óziniń kásibı mamandyǵy retinde qaraıtyn janashyr azamattar basqarmady. Sonyń kesirinen sońǵy 5-6 jylda sport deńgeıi qatty tómendep ketti. Oǵan sebep mádenıet jáne sport mınıstrligin bir arnaǵa toǵystyryp, bir mınıstrlik etýi dep aıtar edim. Bul kezde men de qyzmette júrgenmin. Sport mınıstrligine mýzykanttar kelgendikten, jınalystyń 90 %-y mádenıet salasyna baılanysty ótetin, al sport týraly áńgime tek 10 %-yn qurady. Sol kezde-aq sport qurdymǵa ketken edi. Odan keıin mınıstr bolǵan Abaev sekildi jeke basynyń qamyn oılaǵan azamattar sportty tipten qurtyp ketti.

Búgingi tańda bul saladan qol úzgendikten, sport mınıstrliginiń qanshalyqty shashyrap-tarap ketkenin, bizdiń sporttyń bir júıege kelgen-kelmegeninen, qandaı daıyndyq júrgizilip jatqanynan habarsyzbyn. Máselen, sol baıaǵy 100-den astam sportqa aqsha bólip, Olımpıadaǵa osynsha sporttyń túrinen bardyq dep, bos aýany aınaldyryp jatyr ma, joq pa, ony da bilmedim.

Degenmen biz kórshi elderdi alyp qaraıtyn bolsaq, alysqa barmaı-aq О́zbekstan men Qyrǵyzstanǵa kóz tastasaq, sport salasynda jaqsy deńgeı kórsetip keledi. Ásirese, bizge básekeles bolǵan О́zbekstannyń ózi sol 30-35 sport túriniń ar jaq ber jaǵynda Olımpıadaǵa daıyndyq jasaıdy. Meniń oıymsha, bul óte durys baǵyt. Barlyǵyn qamtý mindetti emes. Bizge de osy kásibı medal alyp kele alatyn árbir aımaq pen oblystarda ózderine qalyptasyp qalǵan sport túrimen ǵana Olımpıadaǵa daıyndyq jasap, soǵan kóńil bólý kerek dep oılaımyn. Onyń ishinde fýtboldy atap ótýge bolady. Men ony endi taldap aıtpaı-aq qoıaıyn”, – dedi Tshanov.

Sporttyń qazirgi jaǵdaıyna shúılikken memleket qaıratkeri, úlken dodada óner kórsetip júrgen boksshylardy da synap tastady. Aıtýynsha, kózinde oty joq sportshylar bokstyń negizgi ádisterinen ada qalǵan.

“Al endi maǵan qazir boks týraly kóp suraq qoıady. О́te durys. Men burynǵy boksshy esebinde, Keńes Odaǵy kezinde sporttyń jalpy qurylymy, sonyń ishinde boks salasy óte joǵary dárejedegi sport túri boldy dep aıta alamyn. Sebebi ol kezdegi boks qolǵaby kishkene attyń qylynan jasalǵan kásibı qolǵap edi. Onda boks kezinde soqqyńyz dóp tıetin bolsa, nokaýtqa túsiredi nemese nokdaýn bolady. Birde bir jarys nokdaýnsyz ótpeıtin edi.

Al qazirgi boksta kúsh-jiger sezilmeıdi, ne nokdaýn da bolmaıdy. Sondyqtan boks qyzyǵýshylyǵyn qatty joǵaltyp aldy. Ony men kásibı boksshy retinde aıtamyn. Biz kezinde tehnıkaǵa erekshe kóńil bóletin edik. Sebebi bokstyń eń negizi ádisi – aıaqpen júrý. Aıaqtyń qozǵalysy arqyly kóptegen soqqydan qorǵanýǵa bolady. Al qazir osyǵan uqsas kóptegen qozǵalys umytyldy. Boks jaı ǵana tóbeleske aınaldy. Arnaıy tehnıka joq. Sondyqtan biz sporttyń bul baǵytyn joǵaltyp aldyq”, – deıdi ol.

Onyń aıtýynsha, egemendi el bolǵaly mysy men minezi basym sportshylarymyzdan kóz jazyp qaldyq.