الەم جاڭالىقتارى
قازاقستان فرانتسۋز اتوم يندۋسترياسىن قولداۋى مۇمكىن
فوتو: اقوردا
“Le Figaro” سايتىندا «قازاقستان – فرانتسيانىڭ ستراتەگيالىق جانە سەنىمدى سەرىكتەسى» تاقىرىبىنداعى پرەزيدەنت قاسىم-جومارت توقاەۆتىڭ ماقالاسى جاريالاندى, دەپ جازادى qandastar.kz
پاريجدە مەملەكەتتىك ساپارمەن جۇرگەن ەل پرەزيدەنتى العاشقى اتوم ەلەكتر ستانتسياسىن سالۋ تۋرالى شەشىم قابىلدانعاننان كەيىن قازاقستان فرانتسۋز اتوم يندۋسترياسىن قولداۋى مۇمكىن دەپ مالىمدەدى.
ماقالادا مۇنداي كۇش-جىگەر ەۋروپا مەن فرانتسيانىڭ ەنەرگەتيكالىق قاۋىپسىزدىگىن قامتاماسىز ەتۋ ءۇشىن ماڭىزدى ەكەنى, بۇل ەكىجاقتى قارىم-قاتىناستىڭ ماڭىزدى اسپەكتىسى ەكەنى العا تارتىلادى. تارقاتا ايتقاندا, تابيعي ۋران ءوندىرىسى بويىنشا الەمدىك كوشباسشى بولىپ تابىلاتىن قازاقستان فرانتسۋز اتوم ونەركاسىبىنىڭ سەنىمدى سەرىكتەسى مارتەبەسىن ساقتاپ قالۋعا ءۇمىتتى.
“پرەزيدەنت ە.ماكروننىڭ وتكەن جىلدىڭ قاراشا ايىندا استاناعا ساپارى بارىسىندا ءبىزدىڭ ەلدەرىمىز سيرەك جەر مەتالدارى, جاڭارتىلاتىن ەنەرگيا كوزدەرى جانە ازاماتتىق اتوم ەنەرگەتيكاسى سالاسىنداعى ءوزارا ءىس-قيمىلدى دامىتۋعا ءوزارا قىزىعۋشىلىق تانىتتى, بۇل ءبىزدىڭ ستراتەگيالىق ارىپتەستىگىمىزدى كەڭەيتۋ ءۇشىن جاڭا پەرسپەكتيۆالار اشادى.
جاقىندا تاۋەلسىز قازاقستانداعى العاشقى اتوم ەلەكتر ستانتسياسىنىڭ قۇرىلىسى تۋرالى جالپىۇلتتىق رەفەرەندۋمنىڭ وڭ ناتيجەلەرى بولاشاقتا ءوزارا ءتيىمدى ىنتىماقتاستىق ءۇشىن بەرىك نەگىز قالايدى. ارينە, بۇل جاھاندىق ەنەرگەتيكالىق قاۋىپسىزدىكتى نىعايتۋعا ىقپال ەتەدى.
ءبىز حالىقارالىق ارەنادا ءسوزسىز بەدەلگە يە جانە ۇلكەن ديپلوماتيالىق تاجىريبەسى بار فرانتسيامەن جۇمىس ىستەۋگە سەنەمىز. ءبىز بىرگە تۇراقتى جانە گۇلدەنگەن الەم قۇرۋعا, قاۋىپسىز قاتار ءومىر ءسۇرۋدى, ءوزارا ءتيىمدى ىنتىماقتاستىقتى جانە جالپىعا ورتاق پروگرەستى قامتاماسىز ەتۋگە ءوز ۇلەسىمىزدى قوسا الامىز”, – دەدى پرەزيدەنت.
