قازاقستان عارىش سالاسىن دامىتۋ ءۇشىن قىتايدان 100 ميلليون يۋان گرانت الادى

فوتو: uznai.kz

شانحاي ىنتىماقتاستىق ۇيىمى ءسامميتىنىڭ ءبىرىنشى كۇنىندە قازاقستان مەن قىتاي عارىش سالاسىن دامىتۋ جونىندەگى ىنتىماقتاستىق تۋرالى كەلىسىمگە قول قويدى. بۇل تۋرالى Stan.kz اقپارات اگەنتتىگى حابارلايدى.

تسيفرلىق دامۋ, يننوۆاتسيالار جانە اەروعارىش ونەركاسىبى ءمينيسترى جاسلان ماديەۆ ەلىمىزدىڭ قىتاي حالىق رەسپۋبليكاسىنان عارىش سالاسىن دامىتۋعا 100 ميلليون يۋان (6 ميلليارد 499 ميلليون 292 مىڭ تەڭگە) گرانت العانىن مالىمدەدى.

“اتالعان قاراجاتتى پايدالانۋدى رەتتەيتىن ءوزارا تۇسىنىستىك تۋرالى مەموراندۋمعا قول قويىلدى. جوبالار تالقىلاۋ ساتىسىندا. ەسەپتەۋ استرونومياسىن, استروفيزيكاداعى مودەلدەۋدى بىرلەسىپ دامىتۋ, عىلىمي-تەحنيكالىق ينفراقۇرىلىمدى نىعايتۋ, قىتايدا تاجىريبە الماسۋ, وقىتۋ جانە تاعىلىمدامادان ءوتۋ جوسپارلانىپ وتىر”, – دەدى مينيستر.

مينيستر ەكى ەلدىڭ حالىقارالىق عىلىمي اي ستانتسياسىن قۇرۋ جانە پايدالانۋ تۋرالى مەموراندۋمعا قول قويعانىن ايتتى.

“قازاقستاندىق ماماندار عارىشتى تەرەڭ زەرتتەۋدە تاجىريبە جيناقتايتىن بولادى. «عالام» جشس جانە «ۆ. گ. فەسەنكوۆ اتىنداعى «استروفيزيكا ينستيتۋتى» جشس كومپانيالارى اي تەلەسكوپىن جاساۋدى جوسپارلاپ وتىر. زەرتتەۋ ناتيجەلەرى جاس ماماندارىمىزدىڭ ماتەماتيكالىق مودەلدەۋ, ينجەنەرلىك تالداۋ, دالمە-ءدال مەحانيكا, ماتەريالتانۋ, عارىشتىق اسپاپتار جاساۋ جانە استروفيزيكا سالاسىنداعى ءبىلىم دەڭگەيىن ارتتىرۋعا ىقپال ەتەتىنىنە سەنىمدىمىز», – دەدى ول.

سونداي-اق مينيسترلىك ينۆەستيتسيا تارتۋدى جانە قىتايلىق Deep Blue Industry Co., LTD كومپانياسىمەن جانە قىتاي حالىق رەسپۋبليكاسىنىڭ يندۋستريا جانە اقپاراتتىق تەحنولوگيالار مينيسترلىگىمەن ىنتىماقتاستىقتى دامىتۋدى جوسپارلاپ وتىر.

ايتا كەتەيىك, بۇعان دەيىن توقاەۆ پەن سي تسزينپين قازاقستاننىڭ بەيجىڭدەگى جانە قىتايدىڭ استاناداعى مادەني ورتالىقتارىن سالتاناتتى تۇردە اشقانى تۋرالى جازعان ەدىك. سونداي-اق استانادا بەيجىڭ ءتىل جانە مادەنيەت ۋنيۆەرسيتەتىنىڭ فيليالى اشىلاتىنى حابارلانعان ەدى.