جاڭالىقتار
«قازاقستان حالقى اسسامبلەياسىنا 30 جىل» رەسپۋبليكالىق فورۋمى ءوتتى
فوتو: اشىق دەرەككوز
2025 جىلعى 1 ناۋرىزدا بەيبىتشىلىك جانە كەلىسىم سارايىندا قازاقستان حالقى اسسامبلەياسىنىڭ مەرەيتويلىق جىلىنىڭ اشىلۋى جانە «قازاقستان حالقى اسسامبلەياسىنا 30 جىل» رەسپۋبليكالىق فورۋمى ءوتتى, – دەپ حابارلايدى qandastar.kz
سالتاناتتى ءىس-شاراعا قازاقستان حالقى اسسامبلەياسى توراعاسىنىڭ ورىنباسارى – قحا حاتشىلىعىنىڭ مەڭگەرۋشىسى مارات ءازىلحانوۆ, پارلامەنت دەپۋتاتتارى, مادەنيەت جانە اقپارات ۆيتسە-ءمينيسترى ەۆگەني كوچەتوۆ, مەملەكەتتىك ورگانداردىڭ, ەتنومادەني بىرلەستىكتەر مەن قحا قوعامدىق قۇرىلىمدارىنىڭ باسشىلارى مەن وكىلدەرى, اسسامبلەيا ارداگەرلەرى, بەلگىلى قوعام قايراتكەرلەرى مەن ساراپشىلار قاتىستى.
فورۋم اياسىندا ەلىمىزدىڭ بارلىق دوستىق ۇيلەرىندە مەملەكەت باسشىسى قاسىم-جومارت توقاەۆتىڭ قازاقستان حالقى اسسامبلەياسىنىڭ 30 جىلدىعىمەن قۇتتىقتاۋى وقىلدى. العىس ايتۋ كۇنىنە وراي «قازاقستان حالقى اسسامبلەياسىنا 30 جىل» ەسكەرتكىش تاقتاسىنىڭ اشىلۋى ءوتتى.
فورۋم بارىسىندا سپيكەرلەر, اسسامبلەيانىڭ بەلگىلى قايراتكەرلەرى قحا-نىڭ قۇرىلۋى جانە ونى قۇرۋ يدەياسى تۋرالى ايتا كەلە, اسسامبلەيانىڭ 30 جىلداعى ماڭىزدى جەتىستىكتەرىن, قازاقستانداعى بىرلىك پەن كەلىسىمدى قولداۋداعى تاريحي ءرولىن, سونداي-اق العىس ايتۋ كۇنىنىڭ ماڭىزدىلىعى مەن مازمۇنىن تالقىلادى.
سالتاناتتى ءىس-شارا سوڭىندا قحا-نىڭ جىل سايىنعى «قايىرىمدىلىق كەرۋەنى» اكتسياسىنىڭ باستالۋى جاريالاندى. اسسامبلەيا ارداگەرلەرىنە قۇرمەت كورسەتىلىپ, ەستەلىك سىيلىقتار تابىس ەتىلدى, سونداي-اق «قازاق ەلىنە مىڭ العىس» مونۋمەنتىنە گۇل شوقتارىن قويۋ ءراسىمى ءوتتى.
ەلىمىزدىڭ بارلىق وڭىرلەرىندە كۇنى بويى قحا 30 جىلدىعىنا جانە العىس ايتۋ كۇنىنە ارنالعان چەللەندجدەر, فەستيۆال-كورمەلەر, كونتسەرتتەر جانە باسقا دا ءىس-شارالار ءوتتى.
