جاڭالىقتار
«قازاقستان حالقىنا» قورىنا جاڭا باسشى كەلدى
فوتو: Instagram/@qazaqstanhalqyna.kz
«قازاقستان حالقىنا» قوعامدىق قورىنا جاڭا باسشى سايلاندى, – دەپ حابارلايدى qandastar.kz
بۇل تۋرالى قوردىڭ Instagram-داعى پاراقشاسىندا جاريالاندى. «قازاقستان حالقىنا» قوعامدىق قورى قامقورشىلىق كەڭەسىنىڭ شەشىمىمەن 2025 جىلدىڭ 1 اقپانىنان باستاپ لاززات شىڭعىسباەۆا «قازاقستان حالقىنا» قوعامدىق قورىنىڭ باسقارما ءتورايىمى بولىپ سايلاندى.
ول بۇعان دەيىن «قازاقستان حالقىنا» قورى باسقارما توراعاسىنىڭ ورىنباسارى قىزمەتىن اتقارىپ, مەملەكەتتىك ناگرادا – «ەرەن ەڭبەگى ءۇشىن» مەدالىمەن, «اتامەكەن» ۇكپ قۇرمەتتى قىزمەتكەرى» مەدالىمەن ماراپاتتالعان.
سونداي-اق, قامقورشىلىق كەڭەس قور قىزمەتكەرلەرى سوفيا ايساعاليەۆانى باسقارما توراعاسىنىڭ ورىنباسارى, سەرىكبەك ەلشىبەكوۆتى «قازاقستان حالقىنا» قق باسقارما مۇشەسى ەتىپ سايلادى.
باسشىلىقتىڭ اۋىسقانىنا قاراماستان, قور جۇمىسىن قالىپتى تارتىپتە جالعاستىرادى. قوردىڭ قامقورشىلىق كەڭەسىنىڭ پىكىرىنشە, باسشىلىقتىڭ اۋىسۋى – بۇل جاڭا تاراۋ, ول قايىرىمدىلىق قىزمەتتى دامىتۋ ءۇشىن قوسىمشا مۇمكىندىكتەردى اشادى.
ال «قازاقستان حالقىنا» قوعامدىق قورىن ءۇش جىل بويى باسقارعان بولات جامىشەۆ وكىلەتتىك مەرزىمىنىڭ اياقتالۋىنا بايلانىستى قىزمەتىنەن كەتتى. ول بۇل قىزمەتكە 2022 جىلدىڭ قاڭتارىندا تاعايىندالعان بولاتىن.
