«Qazaqstan halqyna» qoryna jańa basshy keldi

Foto: Instagram/@qazaqstanhalqyna.kz

«Qazaqstan halqyna» qoǵamdyq qoryna jańa basshy saılandy, – dep habarlaıdy qandastar.kz

Bul týraly qordyń Instagram-daǵy paraqshasynda jarııalandy. «Qazaqstan halqyna» qoǵamdyq qory Qamqorshylyq keńesiniń sheshimimen 2025 jyldyń 1 aqpanynan bastap Lazzat Shyńǵysbaeva «Qazaqstan halqyna» qoǵamdyq qorynyń basqarma tóraıymy bolyp saılandy.

Ol buǵan deıin «Qazaqstan halqyna» qory Basqarma tóraǵasynyń orynbasary qyzmetin atqaryp, memlekettik nagrada – «Eren eńbegi úshin» medalimen, «Atameken» UKP qurmetti qyzmetkeri» medalimen marapattalǵan.

Sondaı-aq, Qamqorshylyq keńes qor qyzmetkerleri Sofııa Aısaǵalıevany Basqarma tóraǵasynyń orynbasary, Serikbek Elshibekovti «Qazaqstan halqyna» QQ Basqarma múshesi etip saılady.

Basshylyqtyń aýysqanyna qaramastan, qor jumysyn qalypty tártipte jalǵastyrady. Qordyń Qamqorshylyq keńesiniń pikirinshe, basshylyqtyń aýysýy – bul jańa taraý, ol qaıyrymdylyq qyzmetti damytý úshin qosymsha múmkindikterdi ashady.

Al «Qazaqstan halqyna» Qoǵamdyq qoryn úsh jyl boıy basqarǵan Bolat Jámishev ókilettik merziminiń aıaqtalýyna baılanysty qyzmetinen ketti. Ol bul qyzmetke 2022 jyldyń qańtarynda taǵaıyndalǵan bolatyn.