قازاقستان كوكپاردان كوشپەندىلەر ويىنىنىڭ چەمپيونى بولدى

فوتوسۋرەت: سپورت قورى

دۇنيەجۇزىلىك كوشپەندىلەر ويىندارى اياسىندا ءتورت كۇن  استانانىڭ تورىندەگى «قازانات» اتشابارىن دۇبىرگە بولەگەن كوكپار ويىندارى بۇگىن مارەسىنە جەتتى, دەپ  حابارلايدى  qandastar.kz.

اقتىق سىندا قىرعىزستان كوكپار كومانداسىمەن سايىسقا تۇسكەن قازاقستاندىق شاباندوزدار 5:4 ەسەبىمەن جەڭىسكە جەتىپ, دۇنيەجۇزىلىك كوشپەندىلەر ويىندارىنىڭ التىن جۇلدەسىن قانجىعالادى.

قىرعىز كوكپارشىلارى كۇمىس جۇلدەگەر اتاندى.

ايتا كەتەيىك, فينالدا كەزدەسكەن قازاق پەن قىرعىز كوكپارشىلارى اراسىندا جانجال تۋىندادى.

ويىن كەزىندە جاعداي ۋشىققان سوڭ ماسەلەگە ءتارتىپ ساقشىلارىنىڭ ارالاسۋىنا تۋرا كەلدى. اتقا مىنگەن كوكپارشىلار الاڭ سىرتىنا شىعىپ, ءبىر-بىرىمەن ءبىرشاما ۋاقىت ەرەگەستى.

ۇزاق ۇزىلىستەن كەيىن ويىن جالعاستى جانە قازاقستان كومانداسى ەسەپتى تەڭەستىرىپ قانا قويماي, العا شىقتى. ەسەپ 4:3. الايدا ويىننىڭ سوڭعى سەكۋندتارىندا قىرعىزستاندىق كوكپارشىلار تاعى ءبىر سالىم سالىپ, ويىندى تەڭەستىرىپ, نەگىزگى ۋاقىت 4:4 ەسەبىمەن تەڭ ناتيجەمەن اياقتالدى.

تورەشىلەر قوسىمشا 10 مينۋت ۋاقىت قوستى. وسى شەشۋشى ساتتە العاشقى سالىمدى قازاق كوكپارشىلارى سالىپ دۇنيەجۇزىلىك كوشپەندىلەر ويىندارىنىڭ چەمپيونى اتاندى.

جەڭىمپاز كوكپارشىلارعا 10 ملن تەڭگە سىياقى بەرىلەدى.

ياعني ورىن ءۇشىن — 10 ملن تەڭگە; 2 ورىن ءۇشىن — 6 ملن تەڭگە; 3 ورىن ءۇشىن — 4 ملن تەڭگە بەلگىلەنگەن.

سونداي-اق, كوك ءبورى رەسپۋبليكالىق فەدەراتسياسىنىڭ پرەزيدەنتى باۋىرجان ءابدىراشيتوۆتىڭ اتىنان مىناداي جۇلدە قورى بەلگىلەنگەن:

كوكپار بويىنشا ءبىرىنشى ورىن ءۇشىن ءار سپورتشى مەن ءار جاتتىقتىرۋشىعا 5 ملن تەڭگەدەن;
كوك ءبورى بويىنشا ءبىرىنشى ورىن ءۇشىن ءار سپورتشى مەن جاتتىقتىرۋشىعا 10 ملن تەڭگەدەن.