Qazaqstan kókpardan Kóshpendiler oıynynyń chempıony boldy

fotosýret: Sport qory

Dúnıejúzilik kóshpendiler oıyndary aıasynda tórt kún  Astananyń tórindegi «Qazanat» atshabaryn dúbirge bólegen kókpar oıyndary búgin máresine jetti, dep  habarlaıdy  qandastar.kz.

Aqtyq synda Qyrǵyzstan kókpar komandasymen saıysqa túsken qazaqstandyq shabandozdar 5:4 esebimen jeńiske jetip, Dúnıejúzilik kóshpendiler oıyndarynyń altyn júldesin qanjyǵalady.

Qyrǵyz kókparshylary kúmis júldeger atandy.

Aıta keteıik, fınalda kezdesken qazaq pen qyrǵyz kókparshylary arasynda janjal týyndady.

Oıyn kezinde jaǵdaı ýshyqqan soń máselege tártip saqshylarynyń aralasýyna týra keldi. Atqa mingen kókparshylar alań syrtyna shyǵyp, bir-birimen birshama ýaqyt eregesti.

Uzaq úzilisten keıin oıyn jalǵasty jáne Qazaqstan komandasy esepti teńestirip qana qoımaı, alǵa shyqty. Esep 4:3. Alaıda oıynnyń sońǵy sekýndtarynda qyrǵyzstandyq kókparshylar taǵy bir salym salyp, oıyndy teńestirip, negizgi ýaqyt 4:4 esebimen teń nátıjemen aıaqtaldy.

Tóreshiler qosymsha 10 mınýt ýaqyt qosty. Osy sheshýshi sátte alǵashqy salymdy qazaq kókparshylary salyp Dúnıejúzilik kóshpendiler oıyndarynyń chempıony atandy.

Jeńimpaz kókparshylarǵa 10 mln teńge syıaqy beriledi.

Iaǵnı oryn úshin — 10 mln teńge; 2 oryn úshin — 6 mln teńge; 3 oryn úshin — 4 mln teńge belgilengen.

Sondaı-aq, Kók bóri respýblıkalyq federaııasynyń prezıdenti Baýyrjan Ábdirashıtovtyń atynan mynadaı júlde qory belgilengen:

Kókpar boıynsha birinshi oryn úshin ár sportshy men ár jattyqtyrýshyǵa 5 mln teńgeden;
Kók bóri boıynsha birinshi oryn úshin ár sportshy men jattyqtyrýshyǵa 10 mln teńgeden.