Қазақстанда құқықтық тәртіп пен қоғамдық қауіпсіздікті қамтамасыз ету саласына жасанды интеллект технологияларын белсенді енгізу жоспарлануда, деп хабарлайды qandastar.kz порталы.
Бұл туралы Ішкі істер министрі Ержан Сәденов Үкімет отырысында баяндады.
Министрдің айтуынша, жаңа Конституцияның преамбуласы мен бірінші тарауында бекітілген «Әділетті Қазақстан» және «Заң мен тәртіп» қағидаттары Ішкі істер министрлігі үшін азаматтардың құқықтары мен бостандықтарын қорғау, профилактиканы тиімді жүргізу және қоғамдық қауіпсіздікті қамтамасыз етудің негізгі негізін құрайды.
«Профилактиканың жаңа субъектілерін және қоғамды жұмылдыру, ерте ден қою, адамдармен жекелеген жұмысты күшейту, кәмелетке толмағандар мен тұрмыстық зорлық құрбандарының құқықтарын қорғауға баса назар аударылды», — деді Ержан Сәденов.
ІІМ жыл сайын Президентке жолданатын Ұлттық баяндама жобасын әзірлеп, Үкіметке енгізетінін хабарлады.
Сонымен қатар, заң бұзушылықтарға нөлдік төзімділік пен міндетті жазалау қағидаты сақталады.
Құқықтық тәртіпті қамтамасыз ету саласында ЖИ және цифрландыру жобалары да жалғасады.
Негізгі бастамалар қатарына Ұлттық бейнемониторинг жүйесін дамыту, аудандағы кезекші бөлімдерді техникалық жаңғырту, бейне-аналитиканы қолдану, жол қауіпсіздігі мен көші-қон бақылауын жетілдіру, сондай-ақ мемлекеттік қызметтердің қолжетімділігі мен сапасын арттыру кіреді.
