«قازاقستان لايىقتى جۇمىس ۇسىنبادى»: 5 ديپلومى بار, بەس ءتىلدى جەتىك بىلەتىن قازاق جىگىتى جاپونيادا جۇمىس ىستەپ ءجۇر

فوتو: ەسبول سارتاەۆتىڭ جەكە ارحيۆىنەن

قازاقستاندىق ەسبول سارتاەۆ مەكتەپ بىتىرگەن سوڭ 3 ەلدە, 4 ءتۇرلى ۋنيۆەرسيتەتتە ءبىلىم العان. بەس تىل مەن تورت ءتۇرلى ماماندىقتى مەڭگەرگەن. سەۋلدە وڭتۇستىك كورەيانىڭ ەڭ ۇلكەن بانكىنىڭ ءبىرىنىڭ باس كەڭسەسىندە, كورەيانىڭ قازاقستانداعى ەلشىلىگىندە جۇمىس ىستەگەن. 42 جاستاعى ازامات 7 جىل وڭتۇستىك كورەيادا تۇرعان. كەيىنگى 6 جىلى جاپونيادا ءوتتى ءالى دە سوندا تۇرادى. بۇگىندە مەديتسينا عىلىمدارىنىڭ دوكتورى ناگاساكي ۋنيۆەرسيتەتىندە جۇمىس ىستەيدى, دەپ حابارلايدى Skifnews.kz اقپارات پورتالى Stan.kz-كە سىلتەمە جاساپ.

جەلىدەگى پابليكتەردە تاراعان اقپاراتتا «قازاقستانعا كەلگەندە بۇل كىسىگە لايىق جۇمىس ۇسىنباپتى, ءتىپتى ۋنيۆەرسيتەتكە وقىتۋشى ەتىپ الماپتى. ەسەسىنە جاپونيا جاقسى ماماندى باعالاپ وتىر» دەگەن سويلەمدەر بولدى. دەگەنمەن ەسبول سارتاەۆ بۇل اقپاراتتى جارتىلاي جوققا شىعاردى.

«بۇل ونشا شىندىققا جاناسپايدى. ءال-فارابي اتىنداعى قازۇۋ-دا جۇمىس ىستەدىم. جۇمىس بەردى, بىراق دارەجەسى تومەندەۋ بولدى. سەبەبى ول كەزدە دوكتور دارەجەسى جوق ەدى. وعان قوسا مەنىڭ سالام باسقا, قازاقستاندا زەرتتەۋ جاساۋىم قيىن. ءتىپتى ونداي ماماندىق تا جوق. مەن ءبىلىم العان سالا بويىنشا جاپونيادا مۇمكىندىك كوبىرەك», – دەدى ول.

ەسبول سارتاەۆ قازاقستاندا ءال-فارابي اتىنداعى قازۇۋ مەن تۇران ۋنيۆەرسيتەتىنىڭ باكالاۆرىن ءبىتىرىپ, وڭتۇستىك كورەيادا ماگيستراتۋرا, جاپونيادا تاعى ءبىر ماگيستراتۋرا جانە دوكتورانتۋرا بويىنشا ءبىلىم العان. بارلىعى 17 جىل بويى 4 ەلدە وقىعان.

ول كورەيانىڭ ەڭ ءىرى بانكىنىڭ سەۋلدەگى باس وفيسىنە جۇمىسقا ورنالاسىپ, قازاقستاندا كورەيا بانكىنىڭ وكىلى رەتىندە بىرنەشە جىل بويى قىزمەت ەتكەن. سول كەزدە ايلىعى كورەياداعى قىزمەتكەرلەردىڭ ايلىعى دەڭگەيىندە بولىپتى جانە كومپانيا ۇيمەن قامتاماسىز ەتكەن. دەگەنمەن ول قازاقستاندا قولداۋ كورسەتەتىن تانىستارىڭ مەن تۋىستارىڭ بولماسا, كوپ جاعدايدا تومەن لاۋازىمدا, تومەن جالاقىمەن قالاسىڭ دەيدى. ەسبول سارتاەۆ ەلىنە ورالىپ, لايىق ورىن تاپپاي جۇرگەندە ونى شەتەلدىك كومپانيا قايتا جۇمىسقا العان.

«قازاقستاننىڭ ازاماتى بولا تۇرا, ەلدە ەكسپات (شەتەلدىك مامان) بولدىم. شىنى كەرەك, كورەيا بانكىنىڭ وكىلى رەتىندە ءوز ەلىمدە جۇمىس ىستەگەنىمدە ءبىر تۇسىنگەنىم: قازاقستانداعى بانك كوممەرتسيالىق بولسا دا, قاراپايىم, تانىسى جوق ادامعا جۇمىسقا ورنالاسۋ وتە قيىن. ورنالاسقاننىڭ وزىندە, تومەن دارەجەدە قىزمەت ەتەسىڭ جانە از جالاقى الاسىڭ. تانىسىڭ بولماسا, قازاقستاندا كوممەرتسيالىق ءىرى كومپانيالارعا دا جۇمىسقا تۇرۋ قيىن.قازۇۋ-دى قىزىل ديپلوممەن ءبىتىرىپ شىققانمەن, قازاقستاندىق مەكەمەدە باعالانبادىم, ايلىق تومەن بولدى. سەۋل ۇلتتىق ۋنيۆەرسيتەتىن ءبىتىرىپ كەلگەنىمدە كوپتەگەن قازاقستاننىڭ كومپانيالارىنا جانە مەكەمەلەرگە تۇيىندەمەمدى جىبەرىپ, سۇحباتتان ءوتتىم. بىراق ەش ناتيجە بەرگەن جوق. سول جىلدارى وتباسى قۇرىپ, بوپەلى بولدىم. بىرنەشە اي جۇمىس ىزدەپ قينالىپ جۇرگەنىمدە مەنىڭ بۇعان دەيىنگى كورەيا بانكىندەگى باسشىلارىم كورەيا ۋنيۆەرسيتەتىن اياقتاعانىمدى ەستىپ, سەۋلدەگى باس وفيسكە قايتا جۇمىسقا شاقىردى. ءبىراز ۋاقىتتان كەيىن لاۋازىمىمدى جوعارىلاتتى. سوندا قايتادان ءوز ەلىمە ورالعاندا, لايىق ورىن تاپپاي, باعالانباي جۇرگەنىمدە شەتەلدىك كومپانيا قايتا جۇمىسقا العان», – دەيدى ول.

ايتۋىنشا, جاقىندا وعان قازاقستاننان بىرنەشە ۇسىنىس ءتۇسىپتى.

«سودان كەين عانا كوپتەگەن ۇسىنىستار كەلىپ ءتۇستى. اسىرەسە مەملەكەتتىك مەكەمەلەردەن كوپ قوڭىراۋلار كەلدى. مەن بۇرىن قاتتى ارمانداپ, جەتە الماي كەتكەن ديپلومات قىزمەتىن دە قاراستىرۋدى ۇسىندى. الايدا ۇسىنىستاردىڭ بارلىعىنان باس تارتتىم. شەتەلدە تاجىريبە مەن ءبىلىم العانىم, ۇلكەن مۇمكىندىكتەرگە جول اشتى دەسەم, ارتىق بولمايدى. شەتەلدە وقىعانىمنىڭ مۇمكىندىگى قازاقستان كەڭىستىگىندە عانا ەمەس, گلوبالدى دەڭگەيدە كەڭەيە ءتۇستى. شەتەلدىكتەر مەنى ارقاشان دا جاقسى باعالايدى. جاقسى جالاقىنىڭ ارقاسىندا ءومىرىمنىڭ ساپاسىن كوتەرىپ الدىم. سودان تەك شەتەلدىكتەرمەن جۇمىس ىستەۋگە, سولارعا لايىق ءبىلىمدى بولۋعا ۇمتىلدىم. شەتەلدەگى وقۋ ورىندارىندا ءبىلىمىمدى ءارى قاراي جەتىلدىردىم. العاشىندا كورەيادا, كەين كەلە جاپونيادا وقىدىم. قازۇۋ-داعى تاجىريبەمدى ەسەپتەمەگەندە نەگىزىنەن تەك شەتەلدىك كومپانيالاردا جۇمىس ىستەدىم», – دەيدى ەسبول سارتاەۆ.