«Qazaqstan laıyqty jumys usynbady»: 5 dıplomy bar, bes tildi jetik biletin qazaq jigiti Japonııada jumys istep júr

Foto: Esbol Sartaevtyń jeke arhıvinen

Qazaqstandyq Esbol Sartaev mektep bitirgen soń 3 elde, 4 túrli ýnıversıtette bilim alǵan. Bes til men tórt túrli mamandyqty meńgergen. Seýlde Ońtústik Koreıanyń eń úlken bankiniń biriniń bas keńsesinde, Koreıanyń Qazaqstandaǵy elshiliginde jumys istegen. 42 jastaǵy azamat 7 jyl Ońtústik Koreıada turǵan. Keıingi 6 jyly Japonııada ótti áli de sonda turady. Búginde medıına ǵylymdarynyń doktory Nagasakı ýnıversıtetinde jumys isteıdi, dep habarlaıdy Skifnews.kz aqparat portaly Stan.kz-ke silteme jasap.

Jelidegi pablıkterde taraǵan aqparatta «Qazaqstanǵa kelgende bul kisige laıyq jumys usynbapty, tipti ýnıversıtetke oqytýshy etip almapty. Esesine Japonııa jaqsy mamandy baǵalap otyr» degen sóılemder boldy. Degenmen Esbol Sartaev bul aqparatty jartylaı joqqa shyǵardy.

«Bul onsha shyndyqqa janaspaıdy. Ál-Farabı atyndaǵy QazUÝ-da jumys istedim. Jumys berdi, biraq dárejesi tómendeý boldy. Sebebi ol kezde doktor dárejesi joq edi. Oǵan qosa meniń salam basqa, Qazaqstanda zertteý jasaýym qıyn. Tipti ondaı mamandyq ta joq. Men bilim alǵan sala boıynsha Japonııada múmkindik kóbirek», – dedi ol.

Esbol Sartaev Qazaqstanda ál-Farabı atyndaǵy QazUÝ men Turan ýnıversıtetiniń bakalavryn bitirip, Ońtústik Koreıada magıstratýra, Japonııada taǵy bir magıstratýra jáne doktorantýra boıynsha bilim alǵan. Barlyǵy 17 jyl boıy 4 elde oqyǵan.

Ol Koreıanyń eń iri bankiniń Seýldegi bas ofısine jumysqa ornalasyp, Qazaqstanda Koreıa bankiniń ókili retinde birneshe jyl boıy qyzmet etken. Sol kezde aılyǵy Koreıadaǵy qyzmetkerlerdiń aılyǵy deńgeıinde bolypty jáne kompanııa úımen qamtamasyz etken. Degenmen ol Qazaqstanda qoldaý kórsetetin tanystaryń men týystaryń bolmasa, kóp jaǵdaıda tómen laýazymda, tómen jalaqymen qalasyń deıdi. Esbol Sartaev eline oralyp, laıyq oryn tappaı júrgende ony sheteldik kompanııa qaıta jumysqa alǵan.

«Qazaqstannyń azamaty bola tura, elde ekspat (sheteldik maman) boldym. Shyny kerek, Koreıa bankiniń ókili retinde óz elimde jumys istegenimde bir túsingenim: Qazaqstandaǵy bank kommerııalyq bolsa da, qarapaıym, tanysy joq adamǵa jumysqa ornalasý óte qıyn. Ornalasqannyń ózinde, tómen dárejede qyzmet etesiń jáne az jalaqy alasyń. Tanysyń bolmasa, Qazaqstanda kommerııalyq iri kompanııalarǵa da jumysqa turý qıyn.QazUÝ-dy qyzyl dıplommen bitirip shyqqanmen, Qazaqstandyq mekemede baǵalanbadym, aılyq tómen boldy. Seýl Ulttyq ýnıversıtetin bitirip kelgenimde kóptegen Qazaqstannyń kompanııalaryna jáne mekemelerge túıindememdi jiberip, suhbattan óttim. Biraq esh nátıje bergen joq. Sol jyldary otbasy quryp, bópeli boldym. Birneshe aı jumys izdep qınalyp júrgenimde meniń buǵan deıingi Koreıa bankindegi basshylarym Koreıa ýnıversıtetin aıaqtaǵanymdy estip, Seýldegi bas ofıske qaıta jumysqa shaqyrdy. Biraz ýaqyttan keıin laýazymymdy joǵarylatty. Sonda qaıtadan óz elime oralǵanda, laıyq oryn tappaı, baǵalanbaı júrgenimde sheteldik kompanııa qaıta jumysqa alǵan», – deıdi ol.

Aıtýynsha, jaqynda oǵan Qazaqstannan birneshe usynys túsipti.

«Sodan keın ǵana kóptegen usynystar kelip tústi. Ásirese memlekettik mekemelerden kóp qońyraýlar keldi. Men buryn qatty armandap, jete almaı ketken dıplomat qyzmetin de qarastyrýdy usyndy. Alaıda usynystardyń barlyǵynan bas tarttym. Shetelde tájirıbe men bilim alǵanym, úlken múmkindikterge jol ashty desem, artyq bolmaıdy. Shetelde oqyǵanymnyń múmkindigi Qazaqstan keńistiginde ǵana emes, globaldy deńgeıde keńeıe tústi. Sheteldikter meni árqashan da jaqsy baǵalaıdy. Jaqsy jalaqynyń arqasynda ómirimniń sapasyn kóterip aldym. Sodan tek sheteldiktermen jumys isteýge, solarǵa laıyq bilimdi bolýǵa umtyldym. Sheteldegi oqý oryndarynda bilimimdi ári qaraı jetildirdim. Alǵashynda Koreıada, keın kele Japonııada oqydym. QazUÝ-daǵy tájirıbemdi eseptemegende negizinen tek sheteldik kompanııalarda jumys istedim», – deıdi Esbol Sartaev.