Qazaqstan men Qytaı shekaradaǵy tranzıt jaǵdaılaryn jaqsartýǵa ýaǵdalasty

Qazaqstan Respýblıkasy Kólik mınıstri Marat Qarabaev pen Qytaı Halyq Respýblıkasynyń Kólik mınıstriniń orynbasary Lıý Veı «Nur joly» Qazaqstan–Qytaı avtomobıl ótkizý pýnktin aralap kórdi, dep jazdy qandastar.kz

Kezdesý barysynda taraptar ótkizý beketiniń jumysyn uıymdastyrý barysymen tanysyp, aýyr júk kólikteriniń júrgizýshilerimen tildesti. Sonymen qatar shekaradaǵy ákimshilik kedergiler men kidiristerdi qosa alǵanda, ózekti máseleler talqylandy.

Kelissózder qorytyndysy boıynsha taraptar shekaradaǵy «tar jerlerdi» birlesip joıý jáne tranzıttik tasymal úshin tıimdi jaǵdaı jasaý týraly sheshim qabyldady.

Budan bólek, eki eldiń beıindi mamandarynan quralǵan turaqty jumys tobyn qurý jóninde ýaǵdalastyqqa qol jetkizildi. Mınıstrlik deńgeıindegi kelissózderdiń kelesi kezeńi bir aı ishinde ótedi dep josparlanýda.

Aıta keteıik, 2024 jyldan bastap Qazaqstan men Qytaı ruqsat blankilerimen almasýdyń elektrondyq formatyna kóshken bolatyn. 2025 jyly taraptar halyqaralyq tasymalǵa arnalǵan 90 myń elektrondyq ruqsat blankisin almastyrdy.