قازاقستان مەن ماروككو كەلىسىمگە قول قويدى

فوتو: پروكۋراتۋرا

قازاقستان مەن ماروككو ىنتىماقتاستىقتى نىعايتۋدا: قىلمىستىق-قۇقىقتىق سالاداعى كەلىسىمدەرگە قول قويىلدى, دەپ جازدى qandastar.kz

قازاقستان رەسپۋبليكاسىنىڭ باس پروكۋرورى بەرىك اسىلوۆ ماروككو كورولدىگىنە جۇمىس ساپارىمەن باردى.

ماروككونىڭ ادىلەت ءمينيسترى ابدەل لاتيف ۋاحبيمەن كەلىسسوزدەر بارىسىندا قىلمىستىلىقپەن كۇرەس, زاڭدىلىق پەن حالىقارالىق قاۋىپسىزدىكتى قامتاماسىز ەتۋ سالاسىنداعى ەكىجاقتى ىنتىماقتاستىق ماسەلەلەرى تالقىلاندى.

كەزدەسۋدىڭ ناتيجەسى قىلمىسكەرلەردى ەكستراديتسيالاۋ, قىلمىستىق ىستەر بويىنشا قۇقىقتىق كومەك, سونداي-اق سوتتالعانداردى بەرۋ تۋرالى مەملەكەتارالىق كەلىسىمدەر جاساۋ بولدى.

قازاقستاندىق قاداعالاۋ ورگانى باسشىسىنىڭ ايتۋىنشا, ماروككو كورولدىگىمەن مۇنداي كەلىسىمدەردىجاساۋ قازاقستان ءۇشىن وتە ماڭىزدى, سەبەبى گەوگرافيالىق ورنالاسۋىنا بايلانىستى بۇل ەل گيبرالتار بۇعازى ارقىلى افريكانى ەۋروپامەن بايلانىستىراتىن باعىت بولىپ تابىلادى.

سونىمەن قاتار قازاقستان رەسپۋبليكاسىنىڭ باس پروكۋرورى 12 جىل بۇرىن ءبىزدىڭ ەل ماروككوعا جاقىن ورنالاسقان ەۋروپالىق مەملەكەت – يسپانيا كورولدىگىمەن وسىنداي حالىقارالىق شارتتارعا قول قويعانىن ەسكە سالدى.

قىلمىسكەرلەر ءۇشىن ىقتيمال جولداردى جابۋ جانە قۇقىقتىق ءوزارا ءىس-قيمىل تەتىكتەرىن نىعايتۋ ارقىلى قازاقستان مەن ماروككو ازاماتتاردى قورعاۋعا جانە ەكىجاقتى قارىم-قاتىناستاردىڭ تۇراقتى دامۋىنا ىقپال ەتەتىن قاۋىپسىز قۇقىقتىق كەڭىستىكتى قۇرۋدا ماڭىزدى قادام جاسادى.

تاراپتار قول قويىلعان حالىقارالىق قۇجاتتاردىڭ قىلمىستىلىقپەن, اتاپ ايتقاندا ونىڭ ترانسۇلتتىق تۇرلەرىمەن كۇرەسۋ سالاسىنداعى ەكى ەلدىڭ قۇقىق قورعاۋ ورگاندارى اراسىنداعى ىنتىماقتاستىقتى نىعايتۋعا جانە قۇقىقتىق ءتارتىپتى, ەكى ەل ازاماتتارىنىڭ كونستيتۋتسيالىق قۇقىقتارى مەن زاڭدى مۇددەلەرىن قورعاۋدى قامتاماسىز ەتۋگە ەلەۋلى ۇلەس قوسۋعا ارنالعانىن ايرىقشا اتاپ ءوتتى.