جاڭالىقتار
قازاقستان مەن OPEC+ ۇيىمى اراسىندا مۇددەلەر قاقتىعىسى تۋىنداۋى مۇمكىن
File Photo Purchase Licensing Rights
ويتكەنى قازاقستاننىڭ قاراشىعاناق كەن ورنىن كەڭەيتۋ جوباسىنىڭ ءبىرىنشى كەزەڭى كۇزدە اياقتالىپ, ال 2026 جىلى ەكىنشى كەزەڭدى اياقتاۋ جوسپارلانعان. وعان قوسا 2025 جىلى تەڭىزدى كەڭەيتۋ جوباسىن اياقتالۋى ءتيىس. ال تەڭىز كەن ورنىندا وندىرىلەتىن مۇناي كولەمى مۇنايعا دەگەن سۇرانىستىڭ تورتتەن ءبىر بولىگىنە تەڭ بولماق. سوندىقتان ۇيىمنىڭ مۇناي ءوندىرىسىن شەكتەۋ تۋرالى تالابىن ۇستانا الماۋى ىقتيمال. مۇنداي بولجاممەن Bloomberg باسىلىمى ءبولىستى, دەپ جازادى qandastar.kz
«قازاقستان وپەك+ قۇرىلعالى بەرى, ون جىلعا جۋىق ۋاقىت بويى كارتەل ءۇشىن كۇردەلى سەرىكتەسكە اينالدى. ول كوبىنە كۆوتادان ارتىق مۇناي ءوندىردى. بۇل ماسەلە كەلەسى جىلى ودان ءارى ۋشىعۋى مۇمكىن, سەبەبى ەلدەگى ەڭ ءىرى مۇناي كەن ورنىن كەڭەيتۋگە $45 ميللياردتىق جوبا اياقتالۋعا جاقىن», — دەپ جازادى باسىلىم.
بۇعان دەيىن ۇكىمەت 2025 جىلى تابىستىڭ 50%-عا دەيىنگى ءوسىمىن تەڭىزدەگى ءوندىرىستى كەڭەيتۋ ەسەبىنەن جوسپارلاپ وتىرعاندىقتان, بۇل جوبانى جۇزەگە اسىرۋ ەل ءۇشىن وتە ماڭىزدى دەگەن ەدى. ال كەشە قارا التىن ءوندىرۋ كولەمىن جىلىنا 100 ملن تونناعا دەيىن ۇلعايتۋ جوسپارىن راستادى. بيىل بۇل كورسەتكىش جوسپاردان تومەن. ياعني 90,3 ملن توننانىڭ ورنىنا 88,4 ملن توننا وندىرەدى.
