الەم جاڭالىقتارى
قازاقستان مەن رەسەي پرەزيدەنتتەرى بىرلەسكەن مالىمدەمە جاسادى
كۇنى كەشە قازاقستان رەسپۋبليكاسىنىڭ پرەزيدەنتى ق.توقاەۆتىڭ شاقىرۋىمەن رەسەي فەدەراتسياسىنىڭ پرەزيدەنتى ۆ.ءپۋتيننىڭ قازاقستان رەسپۋبليكاسىنا مەملەكەتتىك ساپارى ءوتتى.
مەملەكەتتەردىڭ باسشىلارى ءداستۇرلى تۇردە قازاقستان-رەسەي قارىم-قاتىناستارىنا ءتان ءوزارا تولىق تۇسىنىستىك, اشىقتىق پەن سەنىم جاعدايىندا, ەكىجاقتى ىنتىماقتاستىقتىڭ بارلىق كەشەنى بويىنشا جەمىستى كەلىسسوزدەر جۇرگىزدى, وزەكتى حالىقارالىق جانە وڭىرلىك تاقىرىپتار بويىنشا پىكىر الماستى, ەكىجاقتى ءوزارا ءىس-قيمىلدى ودان ءارى تەرەڭدەتۋدىڭ پەرسپەكتيۆالارىن قاراستىردى.
Alash.KZ جازعانداي, مەملەكەتتەردىڭ باسشىلارى 1992 جىلعى 25 مامىرداعى قازاقستان رەسپۋبليكاسى مەن رەسەي فەدەراتسياسى اراسىنداعى دوستىق, ىنتىماقتاستىق جانە ءوزارا كومەك تۋرالى شارتتىڭ, 1998 جىلعى 6 شىلدەدەگى قازاقستان رەسپۋبليكاسى مەن رەسەي فەدەراتسياسى اراسىنداعى XXI عاسىرعا باعدارلانعان ماڭگىلىك دوستىق پەن وداقتاستىق تۋرالى دەكلاراتسيانىڭ, سونداي-اق 2013 جىلعى 11 قاراشاداعى قازاقستان رەسپۋبليكاسى مەن رەسەي فەدەراتسياسى اراسىنداعى ءححى عاسىرداعى تاتۋ كورشىلىك پەن وداقتاستىق تۋرالى شارتتىڭ ەرەجەلەرىنە دەگەن اينىماس ادالدىعىن راستادى.
مەملەكەتتەردىڭ باسشىلارى ساياسي, ساۋدا-ەكونوميكالىق جانە الەۋمەتتىك-گۋمانيتارلىق باعىتتاردا دايەكتى تۇردە نىعايىپ كەلە جاتقان قازاقستان رەسپۋبليكاسى مەن رەسەي فەدەراتسياسىنىڭ وداقتاستىق قارىم-قاتىناستارىنىڭ ورنىقتىلىعىن اتاپ كورسەتىپ, ەكى ەلدىڭ ەگەمەندىگىن, تاۋەلسىزدىگى مەن اۋماقتىق تۇتاستىعىن ءوزارا قۇرمەتتەۋ نەگىزىندە مەملەكەتارالىق ديالوگتى دامىتۋعا ۋاعدالاستى.
مەملەكەت باسشىلارى قازاقستان مەن رەسەيدىڭ ىشكى ساياسي تۇراقتىلىعىنا نۇقسان كەلتىرۋ, ەگەمەندىگى مەن اۋماقتىق تۇتاستىعىن بۇزۋ ارەكەتتەرىنە قارسى بولا وتىرىپ, قازاقستان مەن رەسەي ءبىر-بىرىنە قولداۋ كورسەتۋىن جالعاستىراتىنىن اتاپ ءوتتى, – دەلىنگەن اقوردا حابارلاماسىندا.
رەسەي فەدەراتسياسى پرەزيدەنتىنىڭ قازاقستانعا مەملەكەتتىك ساپارىنىڭ قورىتىندىلارىن جوعارى باعالاي وتىرىپ, وتكىزىلگەن كەلىسسوزدەردىڭ ناتيجەلىلىگىن جانە ولاردىڭ ەكى ەل حالىقتارى ءۇشىن ۇزاق مەرزىمدى وڭ ناتيجەگە باعىتتالعانىن اتاپ ءوتىپ, ۋفا قالاسىندا (رەسەي فەدەراتسياسى) وتكەن قازاقستان رەسپۋبليكاسى مەن رەسەي فەدەراتسياسىنىڭ وڭىرارالىق ىنتىماقتاستىعىنىڭ حح فورۋمىنىڭ جانە الداعى ۋاقىتتاعى اقتاۋ قالاسىندا (قازاقستان رەسپۋبليكاسى) رەسەي فەدەراتسياسىنىڭ باس كونسۋلدىعىنىڭ اشىلۋىنىڭ ماڭىزدىلىعىن مويىنداي وتىرىپ, قازاقستان رەسپۋبليكاسىنىڭ پرەزيدەنتى قاسىم-جومارت توقاەۆ جانە رەسەي فەدەراتسياسىنىڭ پرەزيدەنتى ۆلاديمير پۋتين ءۇش ۇلكەن تاراۋدان (ساياسي ديالوگ, ەكونوميكالىق ىنتىماقتاستىق, مادەني-گۋمانيترالىق بايلانىستار) تۇراتىن بىرلەسكەن مالىمدەمە جاسادى.
قازاقستان رەسپۋبليكاسىنىڭ پرەزيدەنتى ق.ك. توقاەۆ جانە رەسەي فەدەراتسياسىنىڭ پرەزيدەنتى پۋتين مالىمدەمەسىمەن اقوردا سايتىنان تولىق تانىسا الاسىزدار.
